SHILLONG: Guwahati-oni Mendipathar-ona tarianggipa rel ramako South Garo Hills a·jani headquarter Baghmara-onaba ra·angchina MLA-rangni didiangani ja·man, iani bidingo ma·mong sorkari baksa agangrikna a·dokni Chief Minister Conrad K Sangma ku·rachakaniko on·angaha.
“Baghmara-ona rel rama tariangchina South Garo Hills a·jani MLA-rang angko mol·molahani gimin anga iani biding ministry-na u·iatskagen aro anga an·tangba Minister-ko gronge agangrikgen,” ine Sangma, kobor ra·timgiparangna aganaha.
Maming ja·kurangko de·na skangba sorkari, manderang baksa agangrike uamangni nangnikanirangko ra·gen ineba Sangma aganskaaha.
“Rel garirangko ra·angani bidingo chinga manderang baksa agangrikchenggen aro manderang iani bidingo maiko chanchia uko sorkari knatime ra·gen. Ia kamo manderangkoba bak ong·atgenchimosa manderangni nangnikani kri kamrangko ka·na man·gen. South Garo Hills-ona rel garirangko ra·angna man·genchimode ian a·jana namroro silroroaniko ra·baani ong·gen aro ian game ge·e cha·enggiparangna aro bading chiwalgiparangnaba bang·en dakchakani ong·genchim,” ine Chief Minister aganaha.
Baghmara-ona rel rama tariangchina MLA-rangni mol·molaniko badiaba badiaba dolrangde jegalatskaahachim aro niam gri napsrukanirangko champengna Inner Line Permit (ILP) gita dakgipa niamrangko ra·gatchenggijade rel garirangko ra·angna man·kujawa ine aganskaengachim.
Baghmara aro Dhaka-ni gisepo rel ramarangko tarichina MLA-rangni didianiko jegalatengon, Meghalaya a·doko aro mongsongbate Garo Hills-ni dingtang dingtang biaprango skangonin Bangladesh aro gipin biaprangoni manderang niam gri re·napbae songdong a·chatokengani gimin niam gri napsrukaniko champengna rakgipa niamrangko ra·gatchenggija a·song damgnini gisepo rel ramarangko tariahaode, niam gri napsrukbae songdong a·chagiparang bang·batgnok ine Garoland State Movement Committee (GSMC) parakatskaahachim.