Tura: Tura town-o ge·sa mingsinggipa aro gitchambatgipa school-rangoni ge·sa St. Xavier’s Higher Secondary School-ni bilsi 75 gapaniko Sonibar salo maniangaha. Indake ia manianiona Tura-ni Lok Sabha MP, Saleng A Sangma mongsonggipa ong·e sokbaaha. Ia St. Xevier’s School-ko bilsi 1950-o adita manderangchi a·bachengaha indake da·o bilsi 75 gapaniko maniangaha. Principal Sister, Maria D’Silva sokbagipa sakatantikon rimchaksoani kattarangko aganangaha. School bi·sarangni ma·a-parang chatro- chatrirang aro skango ia school-o poraiange dal·gipa mande ong·e kamoni neng·take donggipa butchuma budeparang re·bae bak ra·eanichi 75-gipa Jubilee manianiko mikkim gnangataha. Aro uamang an·tangtangni skang chasongo ia school-o napengmiting somaioniko gisik ra·ate aganangtokaha. Ia manianio School bi·sarang North East-o donggipa dingtang dingtang jatrangni gandingrangko gane chrok mesae dakmesokangtokaha aro 1990 batch-ni student-rangba chroke mesokangtokaha.
Ia manianio mongsonggipa ong·e sokbagipa MP, Saleng A Sangma-ni jinmana aganangengon, St. Xavier’s School- ni bilsi 75 gapaniara nokgipa Isol-ni re·dilani simsakani aro ka·saani dongani giminsa ong·aha unigimin an·ching ia School-ni bilsi 75 gapanina Isol-ko mittelna kraa ine aganangenba ia school-ko a·bachenganiara Tura nasan namgni ong·aija ian Garo Hills gimikna a·songna jatna skia man·anio bilongen dakchakani aro on·gilani ong·chongmotaha ine aganenba sakanti ia school-o skie on·enggipa skigipa sakantikon mittele aganenba mikangchiba chu·sokgipa aro mingsinggipa ong·angkuchina ine sakanti aganangaha.
Ia bilsi 75 gapaniko maniaona mongsonggipa ong·e sokbagiparangara,West Garo Hills-ni Deputy Commissioner, Jagdish Chelani, Tura-ni Bishop Rev. Andrew R Marak , MBOSE-ni Executive Chairman, CP Marak, MCJ-ni General Directress, Sister. Bangizila Kitumua aro dingtang dingtang dilgiparang sokbae bak ra·angtokaha.
