TURA: Ma·mong sorkarionin scholarship-ni tangkarangko watatkujaengani a·selsa chatro chatrirang, scholarship-ko man·tokkujaenga ine National People’s Party (NPP)-chi dilenggipa a·dok sorkarini agananiko Bharatiya Janata Party (BJP) jegalatskaenba, a·dok sorkarionin man·na nanggipa bimingrangko aro 10 percent tangkarangko somoi gita on·atjaengani a·selsa scholarship-ko man·tokkujaenga ine parakataha.
Adita salrangna skangsan a·dokni Chief Minister Conrad K Sangma, chatro chatrirangni scholarship-rangko man·tokkujaengani gimin an·tangni suk ong·gijaniko parakatenba, scholarship-ni tangkarangko ma·mong sorkarionisa, chatro chatrirangni account-ona joljol watatronga ine talataniko on·angahachim.
“Budepa butchumarangni pension, muster roll aro dingtang dingtang man·gnirangkode chinga ma·mong sorkarioni watatoba watatjaoba tangka paisarangko on·sona man·aiachim indiba scholarship-rangko on·aniode ma·mong sorkarioni joljol chatro chatrirangni account-onasa chipatengani gimin chinga mamingkoba dakna man·ja. Chinga scholarship-ni tangka paisarangko on·sogenchimoba, ja·mano ma·mong sorkarioni watatahaode, chinga ua tangka paisarangko man·pilani dongjaha,” ine Chief Minister, social media-o parakatahachim.
Chief Minister-ni iandake talatanina aganchakaniko on·angskaengon, scholarship-ni tangka paisarangko man·kujaenganio iandakgipa kattarangara kakket ong·ja indiba a·dok sorkarisa nanga kamrangko somoi gita matchotatjaenga ine Robibar salo, BJP matnangataha.
“Scholarship man·na nanggipa chatro chatrirangni bimingrangko aro a·dok sorkarini 10 percent bakni tangkarangko watatkujaskalde, ma·mong sorkari, scholarship-ni tangkarangko chatro chatrirangni account-ona chipatjawa. A·dok sorkarini 10 percent baksa ma·mong sorkarini 90 percent-ko chandimosa 100 percent ong·gen. Uni gimin sing·anide, scholarship man·na nangenggipa chatro chatrirangni bimingrangko a·dok sorkari somoi gita watatengama? A·dok sorkarini 10 percent bakko somoi gita watatengama? Ianosa neng·nikanide ong·enga ine anga chanchia. A·dok sorkarini 10 percent aro scholarship man·na nanggipa chatro chatrirangni bimingko somoi gita ma·mong sorkariona watatjaenga,” ine BJP-ni state vice president Bernard N Marak parakataha.
“Scholarship man·na nangenggipa chatro chatrirangni biming aro 10 percent share-ko on·anide a·dok sorkarini daitosa. A·dok sorkarini 10 percent share-ko somoi gita on·atengama ine anga changni chang sing·engachim indiba uamang (sorkari) iani bidingo mamingkon aganchakjaenga,” ineba Marak aganaha.
Scholarship-osan ong·aigija MGNREGA, KISAN card aro uandakgipa dingtang dingtang scheme-ni ning·o a·dokni bakko on·anio ja·manchakengani a·selan ia scheme-ni namgniko man·enggipa manderang neng·nikanirangko chagrongna nangenga ineba Marak parakataha.
“Ma·mong sorkarikode a·dok sorkari matnangna nangja. Scheme-ni namgniko man·enggipa manderangni biming aro 10 percent share-ko on·anide a·dok sorkarini kamsa. Iarangko dakgenchimosa ma·mong sorkari, manderangni account-rangona tangka paisarangko watatna man·a,” ine BJP-ni state vice president parakataha.