SHILLONG: Dilgiparangni gisepo name chanchirimenba ja·ku de·anirang dongjani a·sel Meghalaya a·doko Trinamool Congress (TMC) bilakna man·jaenga ine election strategist Divesh Ranjan aganaha.
Bilakgipa miksonganirang gnangsa TMC, Meghalaya a·dokni politics-ona re·baahachim indiba 2023 bilsini Assembly election-o 13.78 percent vote-rangkosan man·e, seat dambongakosan chena man·aiaha.
2023 bilsini Assembly election-na skang, West Bengal a·dokni Chief Minister Mamta Banerjee aro Abhishek Banerjee-ko man·chape TMC-ni dingtang dingtang dilgiparang re·baenba, campaign-rangko ka·angahachim indiba election-o chu·sokgipa ong·jani ja·man rang·sanan a·doko TMC tang·onangna a·bachengaiaha.
“NPP-chi dilenggipa MDA sorkarini kosako a·dokni manderang kusi ong·tokjaengani gimin adita salrangna skang ong·atanggipa district council election-o TMC-na cholrang namahachim. Ia MDC election-o TMC susagenchimode NPP, Congress aro UDP-ni seat-rangko cheani cholrang dongachim,” ine Ranjan aganaha.
Meghalaya a·doko BJP, MLA sakgnisa dongaioba MDC election-o susaaha indiba sakbonga MLA-rang dongpileba TMC, ia election-o susaskajaha aro iani a·selan Voice of the People’s Party (VPP), bang·bata seat-rangkon chena man·aha ineba ua aganaha.
Uni aganani gitade, MDC election-o susachina gita TMC-ni Meghalaya in-charge Manas Ranjan Bhuiyan-ba raken didianirangko on·ahachim indiba ia election-o susaani bidingo ma·mongni dilgiparang mamingkon aganchakskajahachim.
MDC election-o susaani bidingo TMC-ni state president Charles Pyngrope, TMC-ni dilgipa Abhishek baksa agangrikama agangrikjachimma ukoba ma·sina man·jaha ineba ua aganaha.
TMC dilgiparangni gisepo manderang baksa tom·e chanchirimanirang dongjani a·selan MDC election-na skang, Charles Pyngrope-ni Nongthymmai Block-o TMC-ni bang·bata membor-rang ong·kate kattokaha ineba Ranjan aganaha.
 |
ReplyForward
|