SHILLONG: Meghalaya a·doko niam gri koela bikotani aro salruraani bidingo am·sandina gita BJP-ni songe on·gipa committee-ni report-ko on·na somoi bi·dapaha ine u·iataha.
Ia committee-ko dilna gita BJP-ni state vice president Bernard N Marak-ko songe donangahachim.
A·doko niam gri koela bikotani aro salruraanirangko am·sandie report on·china gita sal 40 somoiko ia committee-na on·angahachim aro da·o ia committee, antigni somoiko bi·dapskaaha.
Batanggimin sal somoirango election-rangko ong·atahani a·sel am·sandianirangko dakanio ja·manchakaha inenba ia committee-na antigni somoiko on·dapchina didiangaha.
“Koela bikotenggipa pilak a·jarangonikon report-rangko on·china chinga committee-ni pilak membor-rangnan u·iataniko on·manaha. Batanggimin salrango election-ko ong·atahani gimin chinga sal 14-ko bi·daptaiaha. Da·o sal 12-ni gisepon chinga report-rangko tarie on·na ka·dongenga,” ine Marak aganaha.
Marak-ni aganani gitade, niam gri koela bikotani aro salruraaniko am·sandianio, dingtang dingtang NGO-rangkoba sing·sandina aro koela a·damrangona re·e sandina nangenga.
“Chinga mitam biaprangonade re·ange am·sandianirangko dakmanaha indiba da·o dipet chingni nike man·anirangko parakna man·kujawa,” ine Marak aganaha.
Matchote tarigimin report-ko skanggipa a·dokni BJP-na on·chenggen aro niamo pangchake ja·mano ia report-ko Delhi-o donggipa BJP-ni dilgiparangna on·atgen ineba Marak parakataha.
A·doko niam gri koela bikotani aro salruraanirangko a·dok sorkari jegalrongengani gimin iako BJP dol, am·sandienba jinmana parakna tik ka·ahachim.
Justice (Retd) BP Katakey committee-ni sandie man·gipani gimin janapatengon, “Niam gri koela bikotani aro salruraanirangko Justice Katakey committee, parake on·na man·ode ian ainni gita dakgrikaniko bilakbatatgen. Chinga iani bidingo ru·uta somoirangonin ku·rang on·engahachim indiba da·alonan chu·sokna man·kujaenga,” ine Marak aganaha.
Niam gri koela bikotanirangko champengna gisiko nangjaengani gimin a·dok sorkariko matnangatengon, “Niam gri koela bikotani aro salruraani bidingo chinga ku·rang on·a changantian sorkari chingna nachil songrongja. Uni gimin da·o chingo committee dongahani gimin niam gri koela bikotani aro salruraaniko champengna chubata gadangona ra·angskagnok,” ine BJP-ni state vice president parakataha.
Niam gri koelarangko bikotengani aro salruraengani a·selan a·dokna kajinarangko man·anio noksan ong·na nangenga ineba Marak parakataha.
“Ia niam gri koela bikotani aro salruraanio a·dok gimikan noksan ong·na nangenga indiba mitam manderangsa namgnirangko man·skaenga. Uni gimin a·doko songdongenggipa manderangni namgnina iandakgipa kamrangko ta·raken champengna nanga,” ine Marak aganaha.