SHILLONG: A·doko gro jinang nangna kenchakanirangko Sombar salo, a·dokni Chief Minister Conrad K Sangma, Assembly-o budget-ni bidingo chanchirimengmiting somoio jegalatenba, a·dokni namroro silroroanirangna jakkalenggipa tangka paisarangara a·doktango man·enggipa cholrangchisa mangrakbatatako man·enga aro nangana bate loan-rangko ra·engani gimin ong·ja ine parakataha.
“Batanggimin adita bilsirangni gisepo an·chingni a·doko man·enggipa cholrang nambatangaha aro chinga a·dokni tangka paisarangko name jakkalna jotton ka·enga,” ine Sangma aganaha.
2019 financial year-onin Meghalaya a·dokni Compounded Annual Growth Rate (CAGR) 15 percent-chi tang·dobataha aro ia apsan somoion a·doktangni kajinarangba 13 percent-chi tang·doaha ine Chief Minister aganaha.
Assembly-o mitam MLA-rangni jajrengchakanirangna aganchakaniko on·angengon, Meghalaya a·dokni namroro silroroaniara loan-rangosa pangchakdugaenga ine mitam membor-rangni agananiko Chief Minister jegalataha.
2026 financial year-na donsoenggipa gong kror 29,438 receipt-rangoni gong kror 3,800-mangni gitasan ra·srogipa tangka paisarang ong·aigen aro bangkide a·doktango man·gipa tangka paisarang aro ma·mongni scheme-rangonisa ong·gen ineba ua aganaha.
Chief Minister-ni parakatani gitade, ma·mong sorkarioniko man·enggipa central tax-rangara, ka·sae on·enggipa tangka paisarang ong·ja indiba Finance Commission-ni dongimin niam gita a·dokni bilan ong·a.
Ia bilsini budget-o Meghalaya a·dokni capital expenditure, 2014 financial year-o gong kror 1,259-oni da·o 2026 financial year-o gong kror 8,469-ona tang·doangahachim ine nikna man·a.
Iandake tangka paisarangni tang·doaniara, dingtang dingtang kamrango aro kamrangko nakatate on·aniko mesokanisa ong·a ine Chief Minister a·kangataha.
Meghalaya a·doko tangka paisani gita deficit ong·ani ba chu·onggijani batroroenga ine jajrengchakaniko jegalatengon, CAG-ni report-o mesokgimin gita 2021 financial year-o fiscal deficit ong·ani 7.7% ong·achim indiba 2024 financial year-ode 6.0 percent-ona komiangaha ine Chief Minister parakataha.
Special Assistance to States on Capital Investment (SASCI)-ni bidingo talataniko on·angskaengon, “Ia bilsio Meghalaya a·dok, SASCI-ni ning·o gong kror 2,450-ko man·soaha aro ian sorkarini tangka paisarangko jakkalanio pangchake bang·bate man·gipa ong·aha,” ine Chief Minister aganaha.