Hahim songko ‘Tourist Destination’ dakna ku·rachaka
BOKO: Assam aro Meghalaya a·dokni simarango songdongenggipa manderangni neng·nikanirangko ma·sie ra·na gita re·anggipa Robibar pringo Assam Kamrup a·jani Deputy Commissioner Deba Kumar Mishra aro Kamrup Zilla Parishad-ni CEO Siddhartha Goswami, dingtang dingtang official-rang baksa Hahim jolrangona re·ange niangaha.
Kamrup a·jani Deputy Commissioner Deba Kumar Mishra aro Kamrup Zilla Parishad-ni CEO Siddhartha Goswami, Boko-onin Hahim jolrangona kilometer 16-mang ong·gipa ramako ja·achi re·ange niangaha.
Uamang Boko-oni a·bachenge, Jarapara, Mouman, Haldhipara, Lalmati, Nalapara aro uandakgipa songrangko nappakangenba, Hahim-ona sokangaha.
Boko-Hahim-Riangdo ramako ja·achi re·angengmitingo Kamrup a·jani DC aro CEO baksana dingtang dingtang official-rangko songni manderang, mande ra·bee rimchaksoaha aro uamang, jolo songdongenggipa manderangni neng·nikanirangko sing·sandie ra·angaha.
Nalapara-ona sokangon, songni manderang, DC-ko grongenba, water supply scheme matchotkujaengani a·sel neng·nikanirangko chagrongna nangtokengani gimin janape on·angaha aro DC an·tangan ua biapona re·ange, ia water supply scheme-ko ta·raken matchotatchina PHE department-ni official-rangko ge·etangaha.
Hahim-ona sokangon, songni manderang, Kamrup a·jani DC-ko grongenba, Hahim bazaar-o a·arang rurongengani a·sel, bang·a dokkanrang aro nokrangkon Hahim chiringchi man·angengani a·sel neng·nikanirangko chagrongna nangtokenga ine janapangaha. Ia Hahim bazaar-o a·arangni ruronganiko namatna gita uamang ta·raken kamrangko ka·gen ine DC, Hahim songni manderangna ku·rachakaniko on·angskaaha.
Dingtang dingtang neng·nikanirang, jekai sorkarini scheme-rangna bank account-rangko kuliani aro uandakgipa kamrango neng·nikanirangko man·na nangengani giminba Hahim songni manderang, Kamrup DC-na parake on·angaha.
Hahim songo DC Deba Kumar Mishra, songni manderang baksa agangrikengon, Hahim songara namen an·sengbegipa biap ong·ani gimin ia songko Tourist Destination dake tarigen ine ku·rachakaniko on·angaha.