Sorkariko chalaianio parak ong·ani dongjani a·sel silroroaniko champengenga: Mukul

SHILLONG: Meghalaya sorkariko chalaianio parak ong·e dakani dongjani a·sel aro tangka paisarangko name jakkaljaengani a·sel namroro silroroaniko champengani gita ong·enga ine Sombar salo, sorkarini budget-ko tariani bidingo jera ra·grikengmiting somoio Songsak-ni TMC MLA aro Opposition dolni dilgipa Mukul Sangma matnangataha.
“Namroro silroroanirangko nikna man·jaengani gimin an·ching golpogrikengon, parake dakanirang donggijanian sakki gita ong·a. Sorkario ong·enggipa Rongjeng MLA-ni agananiko anga janapatna sikenga. Dingtang dingtang scheme-rangko ra·gatani bidingo ua janapaha indiba ua an·tangan ia scheme-rangni bidingo ma·sija ine parakaha. Indide ian sorkarini kamrango parak ong·gijaniko mesokani ong·enga,” ine Sangma aganaha.
Sorkariko chalaienggipa party-ni memboran iandakgipa project-rangko ma·sijaenga ong·ode ian sorkariko chalaianio namgijaniko mesokani ong·enga ine Sangma aganaha.
“Sorkariko chalaienggipa party-ni memboran iandakgipa kamrangni gimin ma·sijaenga ong·ode maikai sorkari, scheme-rangko chu·sokatenga an·ching ma·sina man·enga. Ian tangka paisarangko jakkalsretna cholrangko on·ani ong·a,” ine Opposition dolni dilgipa aganaha.
Assembly-o pass ka·gimin Act ba niamo pangchake social audit-ko ka·na nangani giminba Sangma, Assembly-na gisik ra·ataniko on·angaha.
“Manderangni tangka paisarangko jakkalenga ong·ode songsalo pilak gadangni manderangkon bak ong·ate, manderangni namgninan jakkalna nanga. Namgniko man·na nangenggipa manderangan ma·sijaenga ong·ode maikai an·ching songadam nokadamrango iandakgipa program-rangko name chu·sokate on·na man·gen?” ine Sangma sing·doangaha.
Sangma-ni parakatani gitade, uni dingtang dingtang a·jarangona re·ange am·sandianirangko dakon, scheme-rangko chu·sokataniara Detailed Project Report (DPR)-rang baksa melijaenga ine nikna man·aha.
“Parak ong·anian dongjaode donggenchimoba an·ching maiba ong·enga ine chanchichipna man·aia. Kamrangko chu·sokatanio, seoka man·gipa pilak membor-rangkon bak ong·atna nangachim  indiba ia sorkari kamtangoni re·brangaha aro kamrangko name chu·sokatjaha,” ine Opposition dolko dilgipa aganaha.