SHILLONG: Mahendraganj-ni Bahsapara aro Mawphlang-o rikenggipa Science & Commerce College-rangko matchotkujaengoba, chatro chatrirangni namgnina ia college-rango class-rangko bakan a·bachengatgnok ine Mongolbar salo, a·dokni Chief Minister Conrad K Sangma, Assembly-o parakataha.
“Ia college damgniko rikanio kamrang matchotna somoi nangkuenga ine chinga ma·sienga indiba chatro chatrirangni poraianirango gimaani dongjana gita chinga ta·raken class-rangko a·bachengatna nangnikenga. Je biaprang donga, uarangon chinga class-rangko a·bachengataignok,” ine Assembly-ni question hour-o sing·anirangna Chief Minister aganchakaha.
Ia college damgniko rikani kamrang matchotchina gita sorkari nirok sandianirangko dakgen ineba ua ku·rachakaniko on·angaha.
Iana skang, Mawphlang Science & Commerce College-ko rikani bidingo a·dokni Education Minister, talataniko on·angengon, ia college-ko rikani kamrang 86 percent-ni gita matchotaha aro tangka paisani gita koros ong·ani 94 percent ong·aha ine parakataha.
Ia college-ko matchotatna gita sorkari 2025 bilsini March jakon tik ka·e donahachim ine janapatengon, ia college-o ge 46 kamrangna sorkari proposal-ko on·aha aro college-na bijoli, chi aro ramarangko tarina gita kamrangko ka·engaha ine Education Minister parakataha.
Bahsapara (Mahendraganj) Science & Commerce College-ko rikani bidingo janapatskaengon, kamrang 66 percent-ni gita matchotaha aro korosrang 70 percent-ni gita bon·aha ine Sangma aganaha. Ia college-ko matchotna gita sorkari, 2026 bilsini March 31 tarikko tik ka·skaaha ineba ua aganaha.
Mawphlang Science & Commerce College-na ma·mong sorkari, 90:10 ratio-o gong kror 36.55-ko 2017 bilsini June 30 tariko chamataha aro ianoni gong kror 31.1685-kode watatmanaha ineba Education Minister parakataha.
Apsan daken, Bahsapara (Mahendraganj) Science & Commerce College-naba ma·mong sorkari, 90:10 ratio-o gong kror 36.31-ko 2017 bilsini June 30 tariko chamataha aro ianoni gong kror 23.5274-kode watatmanaha ineba Sangma parakataha.