SHILLONG: Meghalaya a·dokni Police department-o bangbang ong·e dongenggipa kamtangko gapatningjaengani gimin Bristibar salo, Opposition dolni dilgipa Mukul Sangma, an·tangni suk ong·gijaniko parakatenba, Meghalaya Residents Safety & Security Act (MRSSA)-ko man·chape dingtang dingtang kamrango nambate nirok sandianirangko dakna man·na gita ia bangbang ong·e dongenggipa police-rangni kamrangko ta·raken gapatchina sorkariko didiangaha.
Budget Session-ni bon·kamgipa salo chanchirimaniko ra·baengon, dingtang dingtang department aro dolrangoni dakchakanirangko man·engoba Police department, bangbang ong·e donngenggipa kamrangko gapatna man·kujaenga ine Sangma, an·tangni suk ong·gijaniko parakatenba, ia bangbang ong·e dongenggipa kamrangko somoi gita aro parak ong·e gapatchina Police department-ko didiangaha.
Meghalaya a·dokni simarango nambate chel·chakanirangko on·na man·na gita Border Outpost (BOP)-rangko bilakbatatna nangengani gimin janapatengon, me·chikrangni kosako ong·gija dakani case-rangko ta·rake matchotatna gita sandirokani aro charge sheet ka·aniko ta·rakbatatchina Sangma didiangaha.
Bang·bata police-rangan, chonchongipa nokosa an·tangtangni nokdangrang baksa dongna nangenga ine janapatengon, police-rangna komibeoba bedroom ge·gni, hall aro babilsi donggipa nokrangko on·na nanga ine Opposition dolni dilgipa didiangaha.
MRSSA-ni bidingo janapatskaengon, a·doko bang·a manderangan niam gri napsrukanirangna kenchaktokengani gimin manderangni gisikrango ka·donganiko ra·bana man·na gita ia niamko bilakbatatna nangenga ine Sangma aganaha.
Shillong-o traffic jam-rangchi manderang neng·nikanirangko chagrongna nangtokenga ine janapatskaengon, ramana noksarangko salna skang Police-rang baksa chanchirimchengja ine Sangma, a·dok sorkariko matnangataha.
Tura songjinmako adita salrangna skangsan nitobatate tariahaoba badiaba badiaba footpath-rangode bosturangko palengani a·selan manderang rama re·na gita biaprang dongjaenga ineba Sangma matnangataha.
 |
ReplyForward
|
