SHILLONG: Meghalaya a·dok gita chonchongipa a·dokni dilgiparangde national party-rang baksa bak ong·genchimoba kamrangko ka·anio bilgriatako man·rongaia ine gipin political dolrango napani bidingo chanchina skangba ua an·tangni sorkariko chalaiani aro politics-ni kamrango cha·tote nikmangimin kamrangko name nichengenga ine Opposition dolni dilgipa aro Trinamool Congress (TMC) parliamentary party-ni dilgipa Mukul Sangma parakataha.
Sangma-ni aganani gitade, Congress aro TMC gita dakgipa national party-rang baksa bak ong·on dilgiparangni ma·siani aro manderangni namgnina kamrangko ka·anio bang·a changon bilgriatako man·rongaia.
TMC-o chu·sokgipa ong·jaengani gimin ua dingtang political dolrango napskana miksonganirang dongama ine sing·on, ua an·tangni ja·ku de·anirangko name nichengenga ine Sangma parakataha.
“Meghalaya a·dok gita dakgipa biaprangode basakoba chinga national party-rang baksa bak ong·on, manderangko chel·chakanio chagrongna nanggipa ra·bianirangchi bilgriatako man·ronga,” ine Sangma aganaha.
Sangma-ko gipin political dolo napna miksonganirang dongenga ine bang·a manderangan da·o chanchichiptokengoba ua iani bidingo name aganchakna gita jechakskaaha.
Uni politics-o kamko ka·anian manderangna dangdike on·ani aro orto gnang on·gilanian ong·a ineba Sangma aganaha.
“Badia party-o napna miksongenga ingipa sing·anide dingtang dingtang kamrango pangchaka. Congress dolko watchengaonin ian angni name nipilani ong·enga. Angni politics-o ong·anian mingsa miksonganiosan ong·aia aro uan saksa seokako man·gipa dilgipa ong·e, manderangna dangdike on·ani aro on·gilpaanian ong·a,” ine ua aganaha.
1993 bilsio an·tangni politics-o a·bachenganiko gisik ra·atpilengon, Meghalaya a·doko songdongenggipa manderangni una on·gipa cholrangan una sorkariko chalaianio nambate ma·sina dakchakaha ine Sangma aganaha.
Dingtang dingtang sorkari baksa kamrangko ka·rimanichi ua saksa dilgipa ong·e niamrangko tarianio nambate ma·sie ra·na man·aha ineba a·dokni gitcham Chief Minister aganaha.