SHILLONG: Dingtang dingtang political party-rang aro NGO-rangni jegalanirangko man·ahani gimin Meghalaya High Court-ni one-man committee-oniko Justice (retired) BP Katakey-ko ra·galna manchianiko a·dok sorkari donpilaha.
Kobor on·timgiparangni u·iatani gitade, Justice Katakey-ko ra·galna aro committee-ni miksonganirangko nipilna kachario bi·anirang dongja ine Meghalaya sorkari parakataha.
Koelarangko dakkie galani bidingo aro a·dok niam gri koela bikotani aro salruraaniko champengna ia committee, nanga gita ku·pattianirangko on·aha ineba kobor on·timgiparang parakataha.
“Ge·etanirangko ja·rikna sorkari jotton ka·aha aro mitam case-rangode chinga kamrangko nambatatna nangenga,” ine kobor on·timgiparang aganaha.
Justice Katakey-ko ra·galna miksongenga ine VPP, BJP dolrangko man·chape Garo Hills-ni dingtang dingtang dolrangba, a·dok sorkarini kosako jegalanirangko daktokahachim indiba ia kattarangko a·dok sorkari jegalatskaaha.
A·dokni dingtang dingtang biaprango niam gri koela bikotenga aro salruraenga ine badi ka·anirangko man·soahani gimin Justice Katakey committee, ia badi ka·anirangko sandirokengachim ine nikna man·a.