SHILLONG: Meghalaya a·doko niam gri koela bikotani aro salruraani bidingo am·sandina gita BJP-ni songe on·gipa committee-ni report-ko on·na somoi bi·dapahani gimin a·dokni BJP, ia committee-na antigni somoiko on·dapaha.
Iani bidingo committee-ni gita report-ko on·ahaon, BJP-ni state level committee, sandie man·gipani bidingo nanga gita ja·kurangko de·anggnok.
“Chinga apsan tom·e chanchirimaha aro bakan report-ko tarie on·anggen. Chingni sandirokanio chinga antigni somoiko ra·dapaha aro da·o chinga dingtang dingtang biaprangona wene, report-rangko tarienga,” ine committee-ko dilenggipa BJP-ni state vice president Bernard N Marak aganaha.
Niam gri koela bikotanirangko sandirokenggipani bidingo sing·anina aganchakaniko on·angengon, “Chingni daitode, niam gri koela bikotenga ine matnanganiranga kakket ong·ama ong·ja uko sandianisa ong·enga aro chinga kakketko chingni dilgiparangna on·gen,” ine Marak aganaha.
Niam gri koela bikotanirangko rim·a man·genchimode ja·kurangko de·genma ine sing·anina aganchakaniko on·angskaengon, “Chinga chingni report-ko president-na on·gen aro uni ja·man maikai ja·kurangko de·anggen, uade state committee-ni jakosa ong·aignok. Report-ko on·ani ja·mansa chinga nanga gita ja·kurangko de·gen,” ine BJP-ni state vice president aganaha.
Iako uamang ja·ku de·na gita dakenga ong·ja indiba kakketko ong·katatnasa dakenga ineba Marak aganaha.
A·doko niam gri koela bikotani aro salruraanirangko am·sandie report on·china gita sal 40 somoiko ia committee-na on·angahachim aro da·o ia committee, antigni somoiko bi·dapskaahachim.
Marak-ni aganani gitade, niam gri koela bikotani aro salruraaniko am·sandianio, dingtang dingtang NGO-rangkoba sing·sandina aro koela a·damrangona re·e sandina nangengachim.
Matchote tarigimin report-ko skanggipa a·dokni BJP-na on·chenggen aro niamo pangchake ja·mano ia report-ko Delhi-o donggipa BJP-ni dilgiparangna on·atgen ineba Marak parakataha.