SHILLONG: 2024 bilsini March 31 tarikona on·gipa dingtang dingtang grant-rangni gong kror 7,460.84 ong·gipa Utilisation Certificate (UC)-rangko Meghalaya sorkari on·chipkujaenga ine Comptroller & Audit General (CAG)-ni 2023-24 bilsina Finance Account report-o parakaha.
CAG-ni report-o parakani gitade, ia chu·gimik tangka paisarangoni, ming 327 UC-rango nangchakegipa gong kror 2,624.91-kode on·manaha indiba 2024 bilsini March 31 tarikona kingking gong kror 4,835.93 ong·gipa ming 733 UC-rangde bangki dongkuenga. Ian 2022-23 bilsiona on·gipa grant-rangni gong kror 2,261.91 ong·gipa ming 333 UC-rangko aro 2023-24 bilsina gong kror 2,574.02 ong·gipa ming 400 UC-rangkoba man·chapa. Gong kror 424.77 ong·gipa ming 122 UC-rangkode 2023-24 bilsio dongimin somoina skangan on·aha ineba CAG-ni report-o parakaha.
Bangki dongkuenggipa UC-rangoni gong kror 1,921.54-ni ming 96 UC-rangde Centrally Sponsored Scheme (CSS)-rang baksa bak donggiparang ong·a.
Ia UC-rangko somoi gita on·jaenganiara finance account-rango tangka paisa jakkalanirangko hisap rakkiani aro manderangna ia scheme-rang sokengama sokjaenga, uarangni bidingo sing·doanirang ong·kata ineba CAG mikrakataniko on·angaha.