TURA: Tura-ni Babupara jolo donggipa Garo Labour Corps-ni Cenotaph-ko pe·galahani gimin dingtang dingtang dolrang jegaltokengon, da·al Sukrobar salni bako Opposition dolni dilgipa Mukul Sangma, ia biapona re·baenba niena aro ja·mano dingtang dingtang dolrang baksa tom·e iani bidingo agangrikangna sienga.
Ia biapo commercial complex-ko rikna miksongesa Garo Labour Corps-ni Cenotaph-ko pe·galaha ine iana skang, Mothers Union aro dingtang dingtang dolrang matnangtokahachim ine nikna man·a.
Iani bidingo West Garo Hills a·jani Deputy Commissioner Jagdish Chelani, dongnuna jotton ka·aha ineba NGO-rang matnangtokahachim.
Indake ong·genchimoba, Budbar attamo, ua dingtang dingtang dolni dilgiparangko gronge, ia biapo commercial complex-ko rikna miksonganirang dongja indiba ia Cenotaph-ko nambate aro nitobatatesa tarina miksongenga ine talataniko on·angskaahachim.
Iani bidingo Opposition dolni dilgipa Mukul Sangma-ba Sukrobar pringo, ia biapko nina re·baenga ine kobor on·timgiparang parakataha. Ia biapko niangani ja·man ua, Garo Hills-ni dingtang dingtang dolrang baksa tom·e chanchirimna miksongenga ineba kobor on·timgiparang parakataha.
Indake ong·engon, Garo Hills-o songdongenggipa manderangni gisik ra·na aro mande ra·na rakkie donenggipa Cenotaph-ko pe·galahani gimin Bharatiya Janata Party (BJP)-ni state vice president aro Tura-ni MDC Bernard N Marak-ba an·tangni suk ong·gijaniko parakataha aro iani bidingo jinma tom·bimonganiko March-ni 22 tariko Tura-ni District Auditorium-o ong·atanggen ine parakatskaaha.
“Ia biapara a·gilsak gimikni dakgrikanio an·tangtangko on·kange France a·songona re·anggipa pagitchamrangko aro an·tangtangni janggirangko gimaatna nanggipa manderangko mande ra·na aro gisik ra·na rakkie dongipa biapsa ong·ani gimin Garo Hills-ni manderangna namen gamchatbegipa biap ong·achim indiba Garo Hills-o songdongenggipa manderang baksa maming agangrikchengani gri ia Cenotaph-ko pe·galaniara A·chikrangni gamchatbegipa gam-jinko nisie galani gita ong·aha. Uni gimin Garo Hills-o songdongenggipa manderang ong·e iani bidingo apsan chanchirimna re·baenggipa March 22 tariko, jinma tom·bimonganiko ong·atanio bak ra·ena nangchongmota,” ine Marak parakataha.