SHILLONG: Meghalaya Health Insurance Scheme (MHIS)-o man·chapgijagipa dingtang dingtang sanna bananirango a·dokni manderangna dakchakanirangko on·na gita sorkari, CM Care+ scheme-ko a·bachengataha ine a·dokni Health Minister Ampareen Lyngdoh parakataha.
Iani bidingo kobor ra·timgiparang baksa agangrikengon, ia gital CM Care+ scheme-ni ning·o gong lak 5-ona kingking insurance-ko on·ani donggen aro ia scheme, MHIS-ni ning·o man·chapgijagipa dingtang dingtang sanna bananirangna dakchakanirangko on·gen ine Health Minister parakataha.
Ia gital scheme-ara MHIS-PMJAY-o insurance bon·giminrangna namgni ong·gen aro MHIS-ni ning·o man·chapgijagipa sanna bananirangnaba tangka paisani gita dakchakanirangko on·gen ineba Lyngdoh aganaha.
Ia gital CM Care+ scheme-na gadanggni dake ra·chakani donggen aro uan district level-o gong lak 2-ona aro state level-o gong lak 2-oni lak 5-ona ong·gen ineba Health Minister aganaha.
Indake ong·genchimoba, ia gital scheme-ko ma·mong aro a·dok sorkario kam ka·enggiparang aro uamangni nokdangrangde ra·na man·jawa ine Lyngdoh aganaha.
Ia scheme-na pilak case-rangkon e-proposal system gita ra·chakgen aro iana Chief Minister-ni Office (CMO), district aro state level-o committee-rangni recommend ka·anio pangchake ra·chakanggen. Tangka paisarangko, manderangni sanna banani korosrango hisape sanchakgipa hospital-rangona joljol watatgen.