BAGHMARA: South Garo Hills a·jani Siju jolo donggipa tourist spot-rangko namdapatna aro songni manderangna janggi tangani cholrangko on·na miksonge taridapgipa biaprang da·on nosto ong·engaha aro mitam cholrangde gimakuenga ine Garo Students Unit (GSU) Siju regional unit matnangatenba, iani bidingo kachario badi ka·dona ka·mikkenataniko on·angaha.
GSU Siju regional unit-ni parakatani gitade, Siju Dobakkol jolrangko taridapna gita 2021 bilsio Swadesh Darshan Scheme-ni ning·o gong kror 9.3-na baten tangka paisarangko chame on·ahachim indiba ia biaprang da·on nosto ong·pilaniko nikna man·engahachim.
“Ia biapo rope walk aro rock climbing set-ko tarina Protos Adventure Sports aro Brilliant Sangma-na gong kror 2.5-ko chame on·ahachim. Ia biaprangko bilsignimangna skangsan tariahachim indiba da·o ia biapona re·anpile nion, ia biaprangni nosto ong·anikosa nikna man·engaha,” ine GSU Siju unit-ni secretary Welbing Sangma parakataha.
“Chinga iandakgipa bimangrangko tariani bidingo internet-oniko am·sandion, ia kamko lak 15-20-ni gisepon matchotna man·achim ine nikna man·aha. Indiba ia kamrangna gong kror 2.5 chame on·aniara nangana badeangpilaha,” ineba Sangma parakataha.
GSU Siju regional unit-ni parakatani gitade, Siju-o zip line-ko tarinaba gong lak 75 tangkarangko chamataha aro ia kamko saksa Nangwanlambok Nongsiej minggipa contractor ka·ahachim aro unbaksana ia biapo solar lighting project-ko tarina gong lak 56 tangkarangko M/s Samved Energy Systems minggipa company-na on·ahachim indiba ia pilak kamrangkon nikna man·jaha.
“Unbaksana Siju-o bird watch tower, cave interpretation centre, broad walk aro Siju rong·kolo light-rangko tarina gitaba gong kror 3.16 tangkarangko chamatahachim aro ia kamrangko saksa George M Lanong minggipa contractor man·ahachim. Da·o ia biapo interpretation centre aro be·angenggipa bird watch tower-san dongaiaha. Interpretation centre-ko songchengaoni da·onan kulichipkuja aro gipinrangde gimikan gimatokaha,” ine Sangma parakataha.
Siju Do·bakkol-ona rama aro parking lot-ko tariani project-ni bidingo janapatskaengon, “Parking lot-kode matchotaha indiba ianona tarina nanggipa ramakode da·alonan tarichipkuja. Ia parking lot-ona PMGSY ramasan dongaia indiba approach road-de dongkuja,” ine GSU Siju regional unit-ni president Ralseng Marak parakatskaaha.
GSU president-ni u·iatani gitade, ia biapo tarina chamatgiparangoni 70 percent kamrangan dongkujaengoba, contractor-rangna 90 percent tangka paisarangko gamskaahachim.