TURA: Sukrobar salo, Opposition dolni dilgipa Mukul Sangma, dingtang dingtang dolrang baksa, Tura-ni Babupara jolo pe·e galgipa Garo Labour Corps-ni Cenotaph-ona re·ange niangaha aro uni ja·man, West Garo Hills a·jani Deputy Commissioner Jagdish Chelani aro Mothers Union dolko man·chape dingtang dingtang dilgiparang aro dolrang baksa DRDA Conference Hall-o tom·aniko ong·atangaha.
Ia tom·anio Opposition dolni dilgipa aro Trinamool Congress (TMC)-ni MLA Mukul Sangma, dingtang dingtang dolrang baksa chanchirimengon, A·chikrangni gisik ra·na donenggipa aro A·chik pagitchamrangko mande ra·e manirongenggipa biapko pe·galahani gimin sing·doangenba, kamrangko namdapatchina Deputy Commissioner-ko didiangaha.
Ia tom·anio, TMC-ni gitcham MLA Cherak Momin, TMC-ni MDC-rang, Mothers Union-ni membor-rang aro dingtang dingtang NGO-ni dilgiparangba bak ra·angaha.
Dingtang dingtang dolrang baksa tom·e chanchirimani ja·man kobor ra·timgiparangna u·iatengon, “Chinga ia biapko nieaha aro ja·mano District Administration baksana dingtang dingtang dolrang baksa chanchirimaha. Ia Cenotaph-ko pe·galani bidingo aro mikkangchi ia biapko taridapani bidingo Deputy Commissioner, chingna agan-talate on·aha,” ine Sangma parakataha.
Ia biapara A·chikrangni namen gamchatbegipa biap ong·ani gimin maming ja·kurangko de·na skangba name chanchichengna nangachim ineba ua aganaha.
“Anga bebera·a je dakgualanirang dongachim uko uamang namdapatgen. Ia kamo pilakkon bak ong·atna nanga ine anga uamangna talen aganaha. Ia sorkari, ia Cenotaph-ko taridapna ja·ku de·anio maming u·iatchenganiko on·jaha ine anga chanchia. Uni gimin jatna gisik saaniko dongjana gita je kamko ka·engoba pilakkon bak ong·atna nangchongmota,” ine Sangma aganaha.
Ia Cenotaph-ko pe·galani bidingo Garo Hills-ni manderang ong·gija dake nikengani gimin simsake aro name kamrangko ka·na nanga ineba ua aganaha.
Indake ong·engon, ia Cenotaph-ko pe·galanio commercial complex-rangko rikna miksonganirang dongja indiba pilakni namgninasa ia biapko nambate aro jakkaltona gita dake taridapna miksongenga ine West Garo Hills a·jani Deputy Commissioner-ba talataniko on·angaha.
Ia biapo churing chupeke roani aro sel·tagija dake donaniko nikengani giminsa mikkangchi ia biapko rongtalbate rakkina aro ia biapo Garo Labour Corps Day-ko nambate manina gita ia Cenotaph-ko taridapna miksonganirang dongachim ineba ua aganaha.
Ia Cenotaph-ko nitobatate aro nambate tarina gita a·dokni Chief Minister Conrad K Sangma, ia biapko niangani ja·man gong kror 2.15 tangkarangko Tura Municipal Board gita chame on·aha ineba DC parakataha.
Ia gital biapo ‘restaurant’ donggen ine matnangako jegalatengon, ian design-ko tarianio sesretanisa ong·aha aro ian restaurant ong·jawa indiba Garo Labour Corps Day-ko manianio cha·chak ringchakani biapko tarianikosa miksongachim ine DC talataniko on·angaha.
Ia gital rikna miksongenggipa biapo, ramarang apchangket ong·jana gita parking lot-koba dongen aro kosakbatgipa gadango Cenotaph-ko done, ua biapon Garo Labour Corps Day-ko manichakgen ineba ua talataniko on·ataha.
Iani bidingo dingtang dingtang dolrang baksa name chanchirimchengkuja dipet kamrangko dontongatchengaha ineba DC parakataha.
Indake ong·engon, ia kamna dingtangmancha Consultative Committee-ko songna gitaba tik ka·aha aro ia committee-o TMB, GHADC aro dingtang dingtang NGO-rangni membor-rangba bak ong·gen ineba DC parakataha.