WILLIAMNAGAR: Sukrobar salo, a·dokni Soil & Water Conservation Minister Marcuise N Marak, Watershed Yatra-ko East Garo Hills a·jani Songsak C&RD Block ning·o donggipa Koksi Songma songo a·bachengate on·angaha aro ia tom·anio, East Garo Hills a·jani Additional Deputy Commissioner Albert G Momin baksana dingtang dingtang sorkari official-rangba dongpae bak ra·angaha.
Ia Watershed Yatra-ko a·bachengate on·anganio a·dokni Cabinet Minister, jinmana aganprakengon, ia Watershed Yatra-ni nangchongmotgipa ong·ani gimin janapangenba, ia jolrango Jal Jeevan Mission (JJM)-ni kamrangko ka·anio chagrongna nangenggipa neng·nikanirangko niatna ku·rachakaniko on·angaha.
Ia Watershed Yatra-ko re·anggipa March 19 tariko a·dok sorkari, a·dokni skotong Shillong songjinmaoni a·bachengataha aro ia gari, Sukrobar salo, East Garo Hills a·jaonaba sokbaaha.
Ia Watershed Yatra-ra, Pradhan Mantri Krishi Sinchayee Yojana (PMKSY 2.0)-ni WDC-ni ning·o, chini kamrangko ma·siate on·na gita a·dokni dingtang dingtang a·dok aro a·jarangona re·jomenggipa gari ong·a.
Ia tom·anio Songsak-ni gitcham MLA aro Program Implementation-ni chairman Nihim D Shira-ba jinmana aganprakengon, a·dokni pilak kona noksikrangonan a·dok sorkari, namroro silroroaniko ra·bana rakbee kamko ka·enga ine parakataha.
Soil & Water Conservation Williamnagar Division-ni Divisional Officer Corbeth Homa D Sangma-ni jako ra·e ka·enggipa kamrangkoba ua mittelpile aganangaha.
