URA: Dadenggre Sub-Division-ni Permanent Court building-ko Sonibar salo, Meghalaya High Court-ni Chief Justice IP Mukerji, internet gita nokdonggae on·ataha aro ia Court building-ko nokdonggaanio, Meghalaya Legislative Assembly-ni Speaker Thomas A Sangma, a·dokni Law Minister Ampareen Lyngdoh, Meghalaya High Court-ni Judge Justice HS Thangkhiew, Dadenggre-ni MLA Rupa M Marak, Meghalaya High Court-ni Registrar General E Kharumnuid, dingtang dingtang official-rang, songni Nokma-Sordarrang aro jolo songdongenggipa manderangba bak ra·angtokaha.
Ia court building-ko nokdonggae on·anganio Meghalaya High Court-ni Chief Justice IP Mukerji, internet gita jinmana aganprakatengon, ia nitobegipa a·doko kam ka·na cholko man·enga ine an·tangni kusi ong·aniko parakatenba, ia gital court building-ko nokdonggaanichi, songsalo cholgri ong·gipa aro bilgri ong·giparangna kakket bichalko on·na man·gen ine an·tangni ka·dongchakaniko parakangaha.
Ia gital court building-ko rikna gita 2017 bilsini May 18 tarikon acre 7 ong·gipa a·arangko on·chengaha ine janapatengon, 2021 bilsini February 19 tariko ia court-na acre 6.76 a·arangko on·dapaha aro ia gital building-na pangchakaniko 2020 bilsini October 16 tariko songaha ine Chief Justice parakataha.
Ia gital court building-o Court Room-rang, VC Room, office room-rang, security barrack-rang aro dingtang dingtang kuturirang donga ineba Justice Mukerji aganaha.
Ia gital court building-ko rikanio pilak nanga dakchakanirangko on·ahani giminba ua a·dok sorkariko aro dingtang dingtang dolrangko mittelpilangaha.
Ia gital Court building-ko nokdonggaanio jinmana aganprakanggipa gipin manderangara, Meghalaya Legislative Assembly-ni Speaker Thomas A Sangma, a·dokni Law Minister Ampareen Lyngdoh aro gipinrang ong·a.
