Garo Labour Corps-ni Cenotaph-ko gitcham gitan taripilchina Mothers Union dabia

TURA: Tura-ni Babupara jolo donggipa Garo Labour Corps-ni Cenotaph-ko nambate aro nitobatate tarina miksongesa pe·galaha ine District Administration aro Tura Municipal Board (TMB) a·kangengoba, ia Cenotaph-ko skango gitan apsan dake tarie on·pilchina Tura-ni Mothers Union dabiangaha.
“Original bimangko name dake man·piljaoba, apsan dake chingna apsan biapon cenotaph-ko taripile on·na nanggen ine chingni dabienga. A·chikrangni bebera·ani gita gopramko bikote apjitode  ‘Asimalja’-na ine Dr. Mukul-ni janapaniko anga an·tangde ong·e nikjok. Ian ong·na amgijanio bebera·ani ine aganaba gnang indiba basakobarangde an·ching pagitchamrangni seng·anikoba knachakna nanga. Be·grugimin monument-ni bakrangko ia biapni noksiko chanchoke donako nikeora mikchi ong·na am·pilaha. Bolni bakosrangko tarichengsoesa uarangko bikotoba bikotpaode krabatgenchim. Ian ia biapna mande ra·gijaniko mesokani ong·aha,” ine Mothers Union-ni secretary Sume B Sangma parakataha.
Cenotaph-ni gimin talataniko on·angskaengon, “Cenotaph-ni ortoara, je manderangni sigimin bikap gipinchi gimaaha uamangko mande ra·na ge·sa tarigimin gopram ong·a. Ia gopraman uamangko gisik ra·ani aro uamangna kalimani chinba ong·a. Da·alo maini gimin ma·giparang aro adita NGO-rang ku·rang rake on·enga? Skanggipa a·gilsakni dakrikanio France a·songchi an·chingni pagitchamrang bak ra·pana watatako man·aha. Uamangoni aditan songtangona tange sokbapilna man·jaha. Uamaangni ka·donganiko mande ra·na aro uamangko gisik ra·na Tura Lower Babupara-o Cenotaph-ko 1919 bilsio tarie an·ching uamangko bilsiantian July-ni 16 tariko gisik ra·enga,” ine Mothers Union-ni secretary parakataha.
A·chikrangna iandake gamchatbegipa biapko maming u·iatchengani gri pe·galahani giminba ua suk ong·gijaniko parakataha.
“Manderangna u·iatchenggija uamangni skaniko sandichenggija iako pe·na ka·donggipa authority-ko chinga aiao inmanne nikaha. An·tangtangni u·ianio, namnikanio, uamang ia kamko ka·aha aro manderang uamangni daka kam ong·jaha ine jegaloba, uamang an·tangtangni kamko talatkuna jotton ka·engani gimin chinga namen suk ong·ja. Badia Cenotaph-ko building-ni kosako nokking noksiko rikako nikjok? Ia biapo restaurant aro parking lot-ko donna gitaba tik ka·kuenga. Restaurant-ko aro parking lot-ko gipin salrangode chipe donaigen ine an·chingna talatanirangkoba on·aha. Iara an·chingni u·ianiko aro ma·sipaaniko chonika ong·jama? Uamangni miksonganiko uamang ku·rangchi talatjagenchim ong·oba, uamangni kamko nike an·ching u·ina man·a,” ine Mothers Union parakataha.
Ia biapo ong·gija dakgipa manderang churing chupeke aro mitchiatengani giminsa ia Cenotaph-ko taridapna miksongenga ine official-rangni agananiko jegalatskaengon, “Ong·gija dakgipa manderangni ‘sera bera’ kamko champenganiara Administration-ni kam ong·jama? Cenotaph-ko ra·galgijan champengani cholrangko ba nitimgipako doneba ia cenotaph-ko chel·chakna man·jachimma?” ine Mothers Union-ni secretary sing·doataha.