SHILLONG: Meghalaya a·doko niam gri napsrukanirangko champengna gita Inner Line Permit (ILP)-ko ra·gatchengchina dingtang dingtang dolrang dabitokengani gimin a·dokni namroro silroroanina rel garirangko ra·bana nangengoba, manderangni nangnikanirangkoba nichengna nangao ga·akenga ine a·dokni Chief Minister Conrad K Sangma parakataha.
Robibar salo, Network18 Group India Diamond States Summit-ko ong·atanio a·dokni Chief Minister, ia kattarangko aganaha.
Meghalaya a·doko namroro silroroaniko ra·bana gita rel garirangko a·dokna nangchongmotenga indiba manderangni nangnikaniko chu·sokatchenggija rel garirangko ra·badrana jotton ka·genchimode, ian a·doko so·sojengjeng ong·aniko ra·baanisan ong·aigija a·doko namroro silroroaniko ra·bana niksamsoanirangkoba champengani gita ong·gen ine Sangma aganaha.
Chief Minister-ni aganani gitade, manderangni nangnikanirangko chu·sokatchenggija ba manderangna ka·dongatanirangko on·chenggija rel garirangko ra·bagenchimode a·doko neng·nikanirangko chagrongna nangao ga·akgen aro namroro silroroanina niksamsoanirangkoba champengani gita ong·gen.
Meghalaya a·doko manderangsa a·arangni kosako bil man·ani gimin aro jatni dakbewal rikbewalosa kamrangko ka·ani gimin a·dokona rel garirangko ra·baaniara namen neng·beani ong·a ineba Sangma aganaha.
Gnigipa neng·nikanide, niam gri napsrukanirangna kenchakani aro champengna nanganian ong·enga ineba Sangma aganaha.
“Chinga bang·en chanchirimanirangko dakaha indiba da·onan ia neng·nikanirangko namatna man·kujaenga. Cholko man·kujaskal champenganirangde dongkuaigen. Indiba anga bebera·a, dingtang dingtang dolrang baksa agangrikangkuanichi aro ia kamo pilakkon bak ong·atanichi chinga ia kamko mikkangchi chu·sokatna man·gen,” ine Chief Minister aganaha.
Gipin biaprangoni re·baenggipa manderangko name nirokna gita Inner Line Permit (ILP) aro uandakgipa niamrangko ra·gatna nangengani giminba Chief Minister aganaha.
Meghalaya a·dokona re·bae songdong a·chagiparang aro kam ka·e cha·ani cholrangko ra·sekengani giminba Chief Minister janapangaha.