TURA: ‘National Curriculum Framework of National Education Policy (NEP) 2020 on Early Childhood Care and Education (NCFECCE)’ ine pangkchakaniko donenba salgnina National Workshop-ko Central Agricultural University (CAU)-ni ning·o donggipa Tura-ni College of Community Science (CCS)-o ong·atenga aro ia workshop-ko Mongolbar salo, a·dokni Education Minister Rakkam A Sangma, a·bachengate on·angaha.
Ia National Workshop-ko a·bachengatanio, West Garo Hills-ni Deputy Commissioner Jagdish Chelani, West Garo Hills-ni Divisional Forest Officer Ganesan P, Meghalaya State Commission for Protection of Child Rights (MSCPCR)-ni Member JSD Maiong, CSS-ni Dean, Dr. Jyoti V. Vastrad aro gipinrangba dongpae bak ra·angtokaha.
Ia tom·anio, Tura CCS-ni Dean Dr Vastrad, rimchaksoani kattarangko aganangengon, ia National Workshop-ko ong·ataniara, National Education Policy (NEP) 2020-ni niamrango pangchake bi·sarangna lekka porako on·anio skie on·anirangko namdapatna aro bi·sarangna simsakaniko ma·sie ra·na miksonge ong·atanian ong·enga ine talataniko on·angaha.
Ia workshop-ko a·bachengate on·anganio a·dokni Education Minister, jinmana aganprakangengon, iandakgipa workshop-rangko skigiparangna, Anganwadirangna aro ma·a paarangna ong·atanichi, dal·drobaenggipa bi·sarangni skie ra·anio kal·ani aro jakni kamrangkoba mesoke gisiko nangbatatna dakchakani ong·gen ine aganaha.
NEP 2020-ni bidingo agan-talatanirangko on·angengon, an·tangni poraiengmiting somoirango chagrongna nanggipa dingtang dingtang neng·nikanirangkoba ua janapangaha. Songsalni namroro silroroanio lekka porani gamchatgipa ong·ani giminba ia tom·anio Education Minister talate on·angaha.
Ia workshop-ko a·bachengatanio jinmana aganprakanggipa gipin manderangara, West Garo Hills-ni Deputy Commissioner Jagdish Chelani, West Garo Hills-ni Divisional Forest Officer Ganesan P, Meghalaya State Commission for Protection of Child Rights (MSCPCR)-ni Member JSD Maiong aro gipinrang ong·a.
