TURA: An·tangtangni man·gnina chanchie buring bolgrimrango donggipa bol wa·arangko skatang den·engani gimin Centre for Environment Protection & Rural Development (CEPARD) jegalatenba, bol wa·arangko skatang den·e galenggipa manderangni kosako rakgipa sastirangko on·china aro buring bolgrimrangko ripingna nangengani gimin songni nokni manderangna mikrakatanirangko on·china didiataha.
Bol wa·arangko den·aniara mandeni janggiko ra·ana baten namjabata ine adita salrangna skang Supreme Court-ni rai on·gipa kattarangko gisik ra·atpilengon, ian samtangtango ong·telaigiparangna aro songsalna chanchiani gri an·tangtangni man·gninamangmang bol wa·arangko den·enggipa manderangni kosako rakgipa ja·kurangko de·na nangenganiko mesokani ong·enga ine CEPARD parakataha.
“Buring bolgrimrangara, bolrangmangmangsan ong·aija indiba an·chingni dongchakenggipa a·gilsakni ka·sop gita ong·e an·chingna janggiko on·gipasa ong·a. Bolrangko skatang den·aniara an·chingni janggina aro samtangtango ong·telaigiparangna nangchakeaniko ra·baa aro a·a rurongani, chirang chu·onggijani aro ding·anirangko bariata,” ine CEPARD dolni dilgiparang parakataha.
Niam gri bol den·anio bol pangprakna gong lakprak ka·e Supreme Court-ni daiko ra·aniara mikkangchi buring bolgrimrangko ripinganio nambegipa ja·ku de·ani ong·enga ineba CEPARD parakataha.
“Iandake Supreme Court-ni rai on·aniko CEPARD-ba namnikpaa aro ian buring bolgrimrangko ripingna ja·ku de·ani ong·a. Kacharini mesokgimin gita chel·chakgipa biaponiko pang 454 bolrangko den·aniara, rakbatgipa niamrangko ra·gatna nangenganiko mesokani ong·a aro je manderangan ia bolrangko den·anio jak dongachim, uamang pilakan sasti gride jokjawa ine kachari u·iatmanaha,” ine CEPARD parakataha.
Buring bolgrimrangko ripinge rakkina gita dingtang dingtang dolrangko aro dilgiparangko ku·cholsan ong·e kamko ka·china gitaba CEPARD didiataha.