NEHU Tura Campus-ni gital PVC-ko ACHIK dolni dilgiparang grongea

TURA: North Eastern Hill University (NEHU) Tura Campus-o saksa ja·delbatsranggipa skigiparangoni saksa Dr Fameline K Marak-ko NEHU Tura Campus-ni Pro-Vice Chancellor (PVC) songahani gimin an·tangtangni kusi ong·aniko parakna aro una namgipa skanirangko on·na gita A·chik Conscious Holistically Integrated Krima (ACHIK) Krima Council-ni dilgiparang, gital PVC-ko grongeaha.
NEHU Tura Campus-ni gital PVC-ko grongeanio ACHIK Krima Council-ni dilgiparang, NEHU Tura Campus-ni Post Graduate Students Union (PGSU)-ni dilgiparangkoba grongbajolaha.
NEHU Tura Campus-ni gital PVC-ko grongeani bidingo kobor ra·timgiparangna u·iatengon, “A·chik ma·giparangoni saksako NEHU Tura Campus-ni PVC-na seokahani gimin chinga da·alo namen kusi ong·a maina ian jatni namroro silroroanina ja·kuj de·chakatani ong·enga. Uni gimin da·alo chinga una an·tangtangni namgipa skanirangko on·na aro uni kamrango bakrimpaaniko on·na chinga gital PVC-ko grongeaha,” ine ACHIK Krima Council-ni general secretary Happynews Marak parakataha.
NEHU Tura Campus-ni PGSU-ko grongani bidingo janapatskaengon, A·chik jatni namgnina mikkangchi apsan ku·cholsan ong·e kamrangko ka·angna gita uamang, PGSU-ni dilgiparang baksa ku·monganiko on·aha ine ACHIK Krima Council-ni general secretary parakataha.
“NEHU-o poraienggipa A·chik chatro chatrirangni namgnina kamrangko ka·anio PGSU baksa bakrimaniko on·naba chinga ku·rachakaniko on·angaha. Ia tom·anio PGSU-ni dilgiparangba, ACHIK Krima Council-na namgipa skanirangko on·ataha aro iana chinga uamangko mittelpilna ska,” ine ACHIK Krima Council-ni general secretary Happynews Marak parakataha.