TURA: South Garo Hills a·jani Era Aning songo Jal Jeevan Mission (JJM)-ni kamrang matchotaha ine JJM-ni dashboard-o a·kangengoba kamrang chu·gimik matchotjani a·selan bang·a nokdangrang chirangko man·tokkujaenga ine Garo Hills Youth Solidarity (GHYS) matnangataha.
Iani bidingo GHYS-ni president Endick Marak, PHE Department RWS Division, Simsanggre-ni Executive Engineer, JJM-ni Third party inspector-rang aro Era Aning WSS (Era Rongsa Combines WSS)-ni contractor-ni kosako Nongalbibra police station-o FIR-koba ka·doangaha.
GHYS-ni parakatani gitade, Era Rongsa WSS-ni ning·o song dambrina, chong·motan Rongsa Awe, Era Aning, Mengkulgittim aro Agrenggittim songrangna JJM project-ko ra·gatahachim aro ia kamna gong kror 5 batpilen tangka paisarangko chame on·ahachim.
“Indake ong·genchimoba, ia songrango gimik nokdangrangde chi pipe-rangko noktangtangona soke man·tokkuja aro ia JJM-ni kamrangko matchotaha ine songni Village Water Sanitation Committee (VWSC)-na pakwatmanahaoba ge 42 nokdangrangde da·onan chi pipe-rangko man·tokkuja,” ine GHYS-ni president parakataha.
Era Aning songmangmangonikon JJM-na PHE department, ge 133 nokdangrangko segatahachim aro ia ge 133 nokdangrangna chi pipe-rangko sale on·manaha ine ma·mong sorkarina completion report-ko on·ahaoba ge 25-na baten nokdangrangde chi pipe-rangko noktangtangona soke man·tokkuja ineba GHYS matnangataha.
“Chinga ia songrangona re·ange nieaha aro ia songrangoni ge 42 nokdangrangde chi pipe-rangko soke man·kuja ine chinga nikna man·aha. Ia project-na chi tengkiko Era Aning songni kosakosa rikna nangachim indiba korosrangko komiatna gita chi tengkiko ongipa biaposa rikaha aro iani a·selan song gimiknade chirangko sokate on·na man·jaenga,” ine Marak parakataha.