SHILLONG: Tura-ko Winter ba Second Capital songchina dingtang dingtang dolrangni dabianio Meghalaya a·dokni Bharatiya Janata Party (BJP)-ba chakpaaniko on·angaha aro seokako man·gipa Garo Hills-ni pilak dilgiparangkon ku·cholsan ong·e ia dabianio bakrimaniko on·china didiangaha.
“Chingaba Tura-ko Winter Capital songchina nangnikpaengani gimin chinga iani bidingo apsan bakrimenggipa dolrang baksa chanchirimgen. Iako chinga Assembly election-oba chingni mingsa miksongani gita donaha, indide da·o chinga iako maina watgalgen? Ian skangoni ku·rachakgimin kam ong·ani gimin chinga iano manderang baksa ku·cholsan ong·e dabianggen. Ia dabianiko ia term-on be·en pil·atna gita chinga krenge kamko ka·gen,” ine BJP-ni state vice president aro Tura-ni MDC Bernard Marak parakataha.
Marak-ni parakatani gitade, adita salrangna skang, Assembly-ni budget session-ko ong·atanioba Opposition dolni dilgipa Mukul Sangma, iani bidingo chanchirimaniko ra·baahachim indiba ian Opposition doloni ra·bagipa motion-sa ong·ani gimin Garo Hills-ni bang·a dilgiparangan iani bidingo chakpaaniko on·na jechaktokaiaha.
Adita salrangna skang Garo Hills Autonomous District Council (GHADC)-ni session-ko ong·atani bidingo janapatskaengon, Tura-ko Winter Capital songchina dabianio resolution-ko ra·na ruling MDC-rang bakrimaniko ra·pilahani giminsa Opposition MDC-rang, Session-oni ong·kate katna draatako man·aha ine Tura MDC parakataha.
Marak-ni aganani gitade, Tura-ko Winter Capital songchina dabienganiko nipilna aro committee-ko songna sorkari ku·rachakaha ine ruling MDC-rang pa·sikanikosa on·aiaha.
“Iani bidingo a·dok sorkarini kamko ka·aniara manderangni ka·donganirang baksa namen dingtanggrika. A·dokko man·chengaonin Garo Hills-ni manderang, Tura-ko Winter Capital songaniko ka·dongbee nichaktokengachim indiba da·alonan iako chu·sokatkujaenga. Seokako man·gipa Garo Hills-ni dilgiparang, an·tangtangni daitoko ma·sina nanga,” ine BJP-ni state vice president parakataha.
Tura-ko Winter Capital songchina dabianiko adita salrangna skangsan, Assembly-ni Budget Session-ko ong·atanio a·dok sorkari niatna ku·rachakaniko on·angahachim. Iani bidingo kamrangko nipilna gita dingtangmancha committee-koba songna a·dokni Chief Minister Conrad K Sangma ku·rachakaniko on·angaha.