Janggi tanganiko Marathon gita ra·china chatro chatrirangko CM didia

SHILLONG: Sukrobar salo, Indian Institute of Mangement (IIM) Shillong-ni chang 16-gipa Annual Convocation Day-ko ong·atangaha aro ia Convocation Day-ko ong·atanio a·dokni Chief Minister Conrad K Sangma, mongsonggipa sokgipa ong·e bak ra·angaha.
Ia tom·anio a·dokni Chief Minister, IIM Shillong-o graduate ong·angenggipa chatro chatrirangna agan-ku·pattianirangko on·angengon, janggi tanganio chu·sokgipa ong·na gitade, miksongatangko watgalgijagipa aro chakchikrakgipa ong·na nanga ine janggi tanganiko Marathon katsusaani gita ra·china didiangaha.
“Ian Marathon gitasa ong·a, darangkoba nang·ko dontongatna aro watgalatna on·nabe. Janggi tanganio re·mikkangangengon, na·simang dingtang dingtang ra·bianirangko obostarangko chagrongna nanggen aro ia ra·bianirangko na·simang maikai mikkangpaa, uasa na·simangni re·mikkanganiko mesokgen,” ine Chief Minister aganaha.
An·tangni janggi tanganio chagronggimin kamrangko gisik ra·atpilengon, graduate ong·ani ja·man ua maikai re·mikkanggen aro mai kamko ka·gen, uarangni bidingo uni gisiko bang·en jajaanirang ong·kataha ine Chief Minister aganaha.
“Angni graduate ong·chengmiting somoio anga maiko dakgen name ma·sikujaengachim. Indiba angni re·mikkanganio anga mingsako skie ra·na man·aha aro uan janggi tanganide dikdiksani ba changsani kamsan ong·aija, indiba janggi tanga gimiknisa ong·a,” ine Sangma aganaha.
Uni skanggipa changna election-o susae amako man·ani gimin janapatengon, maikai uni chu·sokgijaniko ua chu·sokgipa ong·aniona ra·bana man·aha, uarangni giminba Chief Minister, chatro chatrirangna toe aganangaha.
“Angni skanggipa changna election-o susachengon anga amako man·aha indiba angni chu·sokgijaniko anga skie ra·skana man·aha. Uni ja·man anga chu·sokgipa ong·aha aro MP ong·e ja·mano MLA, finance minister aro da·alo Chief Minister-ba ong·aha. An·chingni janggi tanganio nangchongmotgipa basee ra·anian rakbatgipa basee ra·aniba ong·a indiba jensalo na·a gisikko ja·rike, nang·ni bebera·aniko daka, unon janggi tanganiara namen miksongani gnanggipa ong·baskaa,” ine Sangma aganaha.
Meghalaya a·doko economy-ni tang·dobaengani gimin janapatengon, “Bilsi gittamni gisepon an·chingni GDP, gong kror 9000-oni gong kror 30,000-ona tang·doangaha,” ine Chief Minister parakataha.
“Da·alo na·simang ta·rakbee dingtangenggipa a·gilsakona ja·kuko de·angengaha indiba iandakgipa dingtanganion cholrangba dongskaa. Nambatsranggipa gisikrangde rake kam ka·gipa ba gisik seng·giparang ong·ja indiba jemangan ra·bianirangko mikkangpae, uarangko an·tangtangna chol dake ra·giparangsa ong·a,” ine Sangma aganaha.
Ia Convocation Day-ko ong·atanio, IIM Shillong-oni graduate ong·angenggipa chatro chatrirangna Chief Minister-ni jakchi degree aro medal-rangkoba on·angaha.
Ia tom·anio dongpae jinmana aganprakanggipa gipin manderangara, Honeywell India-ni President Ashish Modi, IIM Shillong Board of Governors-ni Chairman Shishir Kumar Bajoria, IIM Shillong-ni Director Prof DP Goyal aro gipinrang ong·a.