Garo jatni daka-rika bewalrangko ripingangna committee-ko songa

SHILLONG: Garo jatni dakbewal rikbewalrangko ripinganganio nirokna a·dok sorkari sak 28 member committee-ko songaha.
April 3 tariko Chief Secreatry DP Wahlang-ni parakatani gitade, committee-ko Housing Minister Marcuise N Marak-chi dilgen. Member-rango Deputy Speaker Timothy D Shira, Arts and Culture-na in-charge ong·gipa Secretary RP Marak, aro GHADC Chief Albinus R Marak.
Garo jatni dakbewal rikbewalrango nangchapgipa bakrang ba skang chasongoni ripingbagipa biaprangko ma·siangna aro gamchate ra·angan baksa committee niroke kamrangko ka·anggen aro uarangko chel·chakna aro gimaanganiko ripingna ja·kurangko de·anggen.
Garo jatrangni daka rika bewalrang, ku·sikrang aro dakbewalrangko ranta ka·aniko ripingangna chol ramarangko uamangan tarianggen, jeon nangchongmotgipa stakeholder-rang baksa agangrikangchenggen.
Uamangni sandie man·giparangko senggnangan on·china a·dok sorkari, committee-ko ge·etangaha.