Ampati: Meghalaya Board of School Education (MBOSE)-ni Sonibar salo Secondary School Leaving Certificate (SSLC) porikka 2025-ni result-ko parakatao, South West Garo Hills district-ni namgipa pass percentage-ko nikna man·aha. Chu·gimik pass percentage 74.77% chu·sokaniko man·aha. Batanggimin bilsi 2024-ode 28% aro bilsi 2023-o 26%-san ong·achim.
Ia chu·sokaniara poraigiparang, skigiparang, administrator aro a·dok sorkarini kimkim ong·e kam ka·aniko mesoka. Bang·a school-rang teng·suaha, 100% pass percentage-ko man·gipa school-rangara- Nogorpara Deficit Secondary School, Good Shepherd Secondary School, Chapahati, Boldamgre Deficit Secondary School, Jewel Secondary School, Mahendraganj, Kasturba Gandhi Vidyalaya Balika Girl’s Residential School Betasing aro Zikzak, Mothers’ Union Secondary School, Ampati, Bidan Bisik Secondary School, Rangsakona, St. Francis De Sales Secondary School, Mellim, Katuli Deficit Secondary School, Vidyamoni Secondary School, Garobadha aro Rangsakona Deficit Higher Secondary School ong·a.
District-ni chu·sokani baksa Mahedraganj Higher Secondary School-ni Mahir Islam, a·dokni ranking-o 570 marks-ko man·e 5-gipa position-ko man·aha. St. Claret Secondary School, Ampati-ni sakgipin student Tengkim G. Sangma, Health and Physical Education subject-o chu·gimik 100 mark-ko man·aha.
Indake St. Dominic Savio School, Garobada-ni student Amamy A. Sangma aro Arbina Ch. Marak- mang gimik subject-rango distinction marks-ko man·aha.
