SHILLONG: 2023-24 bilsini gisepo National People’s Party (NPP)-na tangka paisani gita on·gilani 98.02 percent-chi komiangaha ine Association for Democratic Reforms (ADR)-ni chapa ka·anio parakaha.
NPP-na on·gilaniko ADR-ni parakani gitade, 2022-23 bilsio gong kror 7.479 ong·aoni 2023-24 bilsiode gong kror 0.148-san ong·e, gong kror 7.331-ni gita dingtanggrikani dongaha.
Ia ADR-ni report-ara national political party-rangna gong 20,000-na bate on·gilaniko nisusae Election Commission of India (ECI)-na report on·gipa ong·a aro ADR-ni report-o national party-rangoni NPP-kon komibate on·gilanirangko man·gipa ine a·kangaha.
2023-24 bilsini gisepo NPP-na tangka paisarangko on·gilatgipa manderangoni bang·bate on·gilgiparangara, gong lak 5-ko on·gilgipa Guwahati-ni Manjushree Plastics, gong lak 3-ko on·gilgipa Dalu-ni Bimal Saha, gong lak 2-ko on·gilgipa Mahmood A Sangma, gong lak 1.5-ko on·gilgipa Shillong-ni Merimeker aro gong lak 1-ko on·gilgipa Itanagar-ni Thangwang Wangham ong·a.
Gong lak 14.80 tangkarangko receipt-ni tarikko parakgija NPP man·soaha ineba ADR-ni report-o parakaha. Apsan daken, BJP, Congress, AAP aro CPI(M) dolrangba tangka on·gilani tarikrangko mesokgija donaha ineba ADR report-o parakaha.
