BAGHMARA: Secondary School Leaving Certificate (SSLC) porikkako pass ka·gipa chatro chatrirangna South Garo Hills a·jani college-rango aro higher secondary skulrango biaprang chu·ongjaengani gimin Mindikgre Adhoc skulkoba higher secondary-ni gadangona ra·doatchina South Garo Hills a·jani social activist Greneth M Sangma, South Garo Hills a·jani District School Education Officer (SDEO)-na sedoataha.
Ia chang SSLC porikkao Garo Hills gimikon pass ka·gipa chatro chatrirang bang·batahani gimin higher secondary skulrango aro college-rango biaprang chu·ongjana kenchakanirang ong·engachim ine nikna man·a.
Indake ong·engon, South Garo Hills a·jaoba ia chang SSLC porikkani pass percentage, Garo Hills gimiko nambatgipa ong·ahani gimin chatro chatrirang, songtangtango admission-rangko ra·anio neng·nikanirangko chagrongna nangtokenga ine Sangma parakataha.
“Ia chang SSLC porikkao name chu·sokna man·paahaoba Mindikgre jolni chatro chatrirang college aro higher secondary skulrango admission-ko ra·anio neng·nikanirangko chagrongna nangtokenga. Uni gimin jolo donggipa chatro chatrirangni namgnina Mindikgre Adhoc skulkoba higher secondary-ni gadangona ra·dochina chinga nangnikenga aro ia skulko higher secondary-ni gadangona ra·doatanichi ia jolrango chol ong·pagijagipa bang·a chatro chatrirangna namgni ong·genchim,” ine Sangma parakataha.
Ia bilsini SSLC porikkao pass ka·gipa chatro chatrirang, admission-rangko ra·anio neng·nikanirangko man·jana gita a·dokni pilak sorkari skulrangkon higher secondary-ni gadangona ra·doatgen aro je private skulrangba higher secondary section-ko kulina nangnikengachim, uandakgipa skulrangnaba sorkari No Objection Certificate (NOC)-rangko on·gen ine adita salrangna skangsan a·dokni Education Minister Rakkam A Sangma parakatahachim.