Rongara Block-ni LP skul nok te·sako tarie on·china ASPF didia

TURA: South Garo Hills a·jani Chokpot C&RD Block ning·o donggipa Seelpang Government LP skul nokni obosta namsrangjahani a·sel skulo poraienggipa bi·sarang aro kam ka·enggiparangba neng·nikanirangko chagrongna nangtokenga ine A·chik State People’s Front (ASPF) parakatenba, ia skul nokko ta·raken taripile on·china a·dokni Education Minister Rakkam A Sangma-ko didiataha.
ASPF-ni chief organizing secretary Raksim Marak-ni parakatani gitade, ia skulara a·dokni Education Minister aro Rongara-Siju constituency-ni MLA Rakkam A Sangma-ni a·jaon ga·akgipa skul ong·a aro ia skul nokko 1998 bilsionin jakkalengahaoba changsaba taridape on·anirang dongkujaengachim.
“Ia skul noko nokkingrangba dongjaha aro do·ga kelkirangba be·tokaha indiba da·alonan indakgipa skul noko bi·sarangna lekka porako on·enganiara namen dukni katta ong·a,” ine ASPF-ni chief organizing secretary parakataha.
Bi·sarangna lekka porako on·na gita skul nokrang naljokgipa ong·na nangchongmota ine janapatengon, ia skul noko nokkingrang dongjae da·o gita mikkarang waahaode bi·sarangna lekka porako on·anio neng·nikanirangko man·na nangenga aro ding·karioba salrang rakani a·sel class-rangko name ra·na man·jaenga ine ASPF-ni dilgipa parakataha.
Ia skul nokni obosta namsrangjahani giminan skulni skigipa saksa, skulni nangchongmotgipa bosturangko naljoke rakkina gita an·tangni koroschi bostu donchakgipa kuturikode tin pine on·aha ineba ASPF-ni chief organizing secretary parakataha.
“Uni gimin ia skulo chagrongna nangenggipa neng·nikanirangko chel·chakna ta·raken dakchakanirangko on·china chinga didienga,” ine a·dokni Education Minister-na sedoatgipa chittio ASPF-ni chief organizing secretary janapataha.