SHILLONG: 2008-2009 bilsio Meghalaya sorkarini Lower Primary skulna assistant teacher-rangko seokanio ong·gija dakani case-o an·tangni kosako matnanganirangko den·galchina gita a·dokni Cabinet Minister Ampareen Lyngdoh-ni mol·mole dorgasto galaniko hearing dakna Sukrobar salo, Meghalaya High Court a·bachengataha.
Ia hearing dakanio ukil sakgnian, skigiparangko ra·anio ong·gija dakanina matnangako man·gipa Law Minister aro gipinrangni kosako ra·gatgipa 2020-ni Special Case No 2-o pangchake, Shillong-o Special Judge-ni kachario dorgasto galaniko janaptokaha.
Ia case-o sakkirang bang·dugaani gimin bichal ka·aniko ta·rakbatatna gita 2025 bilsini February 25 tariko Chief Justice IP Mukerji-ni raiko on·ani giminba ukilrang janapangaha.
Iano pangchake, sak 492 sakkirangoni sak 317 sakkirangko galenba gipin sakdok sakkirangko ra·dapskana bichal ka·giparang tik ka·angaha aro ia application-ko bichal ka·enggipa on·aha ine kacharina aganaha.
Iana skangba ia case-ni bidingo sak 28 sakkirangkode ukilrang sing·sandimanahachim.
Indake ong·engon, da·o changgipin bichak ka·aniko re·baenggipa May jani 5 tarikona tik ka·e donataha aro je cholchiba ia bichal ka·aniko da·o a·bachengatanggnok.
“Ia application chu·sokgipa ong·genchimode uan bichal ka·aniba bon·aignok indiba ia chu·sokgipa ong·jagenchimode bichalko ka·angkuaigen. Angni nikani gitade, Section 482 application-ko matchotatchenggijade ia bichal ka·angkuani maming orto dongjawa. Ia kachari, bichal ka·aniko dontongatenga ong·ja indiba ia bichal ka·aniko matchotatna gita somoirang melikujaskal sakkirango sing·sandianiko dontongchengkunasa Shillong-o donggipa Special Judge (CBI)-ko mol·molanisa ong·enga,” ine kachari parakataha.