Mukul Sangma, Capt. Williamson Sangma State University-ko nirokea

Tura: Meghalaya Legislative Assembly-ni Opposition-ni dilgipa Dr. Mukul Sangma Meghalaya a·doko kuligipa Captain Williamson Sangma State University-ko Sukrobar salo re·ange nienba namdapatna nanganirang dongkuengako aganaha. Ia State University-o niroke kam ka·na donatako man·gipa Vice-Chancellor baksa golpoaha aro golpoanganio civil society-ni dilgiparangba dongpae namdapatna nanganirangko mesoke on·paaha. University-ko bilsi 2011-o Assembly-o niamo passed ka·emingna niam gita rikna a·bachengaha, matchotemingna ia bilsian post graduate-ni class-rangko a·bachengnok unbaksana an·chingni a·doktangni university-o an·chingni a·doko dingtang dingtang college-rangoni ge 23 college-rang ia university-o affiliate ka·aha ba nangdimataha, uandake mikangchi ia university chu·sokgipa ong·gen ine sakki on·a gita ong·enga ineba Sangma aganangaha.
Da·ororo gital gital college-rangko bang·en kulienga jerangkon affiliate ka·kuja uarangba ia university-o affiliate ka·na man·gen unbaksanaba je chadamberangan graduation-ni ja·mano post graduation-ko poraidapma gita North East ni dingtang dingtang university-rango napna ba admission ra·na gita CUET entrance examrangko sechengna nangani gimin neng·nikako man·ronga aro unbaksa an·tangni namnika department-ko poraina skoba man·ja, maina central university-o affiliate ka·gipa university-rangde central government-ni dongimin niamko ja·rikna nangtelaia ine Sangma aganangaha. Indake ong·genchimoba ia an·chingni gital University-o affiliate ka·gipa college-o admission ra·na gita indakgipa test rangko ra·na gita nangjawa indiba ia university-ni ra·gatgimin niamrang donggen aro niamo pangchake kam ka·a baksana gimik college-rangonan dongimin niamrangko sokatgen ineba Sangma aganangaha.
India a·songni state on·gimin niamo pangchake assembly-o pass ka·e state-ni skanggipa University-ko A·chik a·songo rikaha a·doktango State University dongahani gimin an·ching iako dal·e ra·na ine aganenba A·chik a·songni chadamberang ma·a pani sepango donge poraina gita chol ong·a baksana post graduation matchote dingtang dingtang gadango poraie pass ka·giparang donga uamang ia University-on kam ka·naba chol ong·gen  ine Dr. Mukul Sangma aganaha.