SHILLONG: Shillong Airport-ko dal·batatna gita kamrangko bakan a·bachengna siengahani gimin re·baenggipa bilsionide ia airport-o dal·dalgipa sildorengrangko watna man·naba dongaha ine Sombar salo, a·dokni Deputy Chief Minister aro Transport Minister Sniawbhalang Dhar parakataha.
Iani bidingo kobor ra·timgipa manderang baksa agangrikengon, “Shillong Airport-ko dal·bate tarina Airport Authority of India (AAI) tender-ko on·engahani gimin 2026 bilsini gisepon dal·dalgipa sildorengrangko ia airport-o onchongatna man·gnok ine anga ka·dongenga,” ine Dhar aganaha.
Tender-ko on·engahani gimin kamrangko bakan a·bachenggnok ine janapatengon, “Iana a·a ra·ani kamrang da·o matchotna siengaha aro chinga bakan a·arangna tangkarangko gamgnok. Pilak kamrangan da·o nangani kri ong·angengahani gimin AAI, tender-ko on·engaha,” ine a·dokni Deputy CM aro Transport Minister parakataha.
Dhar-ni parakatani gitade, Shillong airport-ko dal·batatna indita bilsirang sengani ja·man re·anggipa April 5 tariko AAI, tender notice-ko on·angaha.
Ia airport-ko dal·batatanio, airport-ni runway-ko metre 571-chi bakrodapate gimik metre 2400-chi airport-ko dal·batatna miksongenga.
Tender notice-o parakani gitade, ia airport-ko dal·batatna chamsoenggipa korosara gong kror 119.44 ong·enga aro ia kamko ja 18-ni gisepo matchotna ka·dongenga.
Da·o dipet Shillong airport-oni ATR 72 sildorengrangkosan bilatkuengachim indiba ia airport-ko dal·batatna cholrangko sandion, ia airport-ko dal·batatna cholrang dongkuenga ine AAI nikahachim.
Shillong airport-ko dal·batatanio aro namdapatanio pilak nanga dakchakanirangko on·china gita Union Civil Aviation Minister Kinjarapu Ramohan Naidu-ba ma·mong sorkariko didiangahachim.