Balwa rakanio pe·anggipa skul nokko rike on·china ADIL didia

TURA: Robibar attamo, West Garo Hills a·jani mitam biaprango rang·san balminduri balanganichi Bangsidua ME skul nokba chu·gimik nosto ka·ako man·na nangahani gimin ia skul nokko taripilna man·na gita dakchakanirangko on·china A·chik Dedicated Integrity Leaders (ADIL) Phulbari Western Zone, Dadenggre sub-division-ni District School Education Officer (DSEO)-na sedoataha.
ADIL Phulbari Western Zone-ni parakatani gitade, balminduri balanganio ia skulni nokkingrang kikako man·an baksana pakmarangba be·aha aro skul nokni do·ga kelkirangba nosto ka·ako man·na nangaha.
“Balrinduri balanganio ia skul nok nosto ka·ako man·angahani gimin ian class-rangko ra·anio neng·nikanirangko aro poraienggipa bi·sarangnaba kenchakna nanganiko ong·ataha. Uni gimin ia skulo poraienggipa bi·sarangna lekka porako name on·angkuna man·na gita ia skul nokko rikpiltaina ta·raken tangka paisarangko dakchake on·china chinga mol·molenga,” ine ADIL Phulbari Western Zone-ni membor-rang, Dadenggre sub-division-ni SDEO-na sedoatgipa chittio janapataha.