Friday, July 11, 2025
spot_img

MHIS-ni namgniko ra·na gita Aadhar-na biming segatchina Health Minister didia

Date:

Share post:

spot_imgspot_img

SHILLONG: Meghalaya a·doko Megha Health Insurance Scheme (MHIS)-na biming segatani 80 percent gapna siengahaon, sanna bananirangko ra·na gita sorkarini on·enggipa ia scheme-ni namgniko ra·na Aadhar-na biming segatna nangchongmotenga ine Mongolbar salo, a·dokni Health Minister Ampareen Lyngdoh parakataha.

“Officer-rang baksa anga nipilanirangko dakon, MHIS-na biming segatani da·o 80 percent gapna siengaha ine nikna man·aha. MHIS-na biming segatani kraa gitan bang·aha indiba gimikande Aadhar baksa link ka·giparang ong·kujaenga. Manderang saanirangko man·on neng·nikanirangko chagrongna nanga aro unosa an·ching iani gamchataniko ma·sia,” ine Lyngdoh aganaha.

Aadhar gri MHIS card donggipa manderangde sanna bananirangko ra·ani somoirango bang·en tangka paisarangko koros ka·na nangenga aro iani giminsa MHIS card-rangko Aadhar baksa link ka·na nangenga ineba Health Minister talataniko on·angaha.

MHIS card-rang baksa Aadhar-ko link ka·gijani gimin janapangengon, “Saanirangko man·ani somoirango manderang bang·e cholrang dongrongbreja. Uni giminsa iandakgipa scheme-ni namgnirangko ra·na Aadhar baksa link ka·na nangchongmota ine chinga aganenga. Je manderangan MHIS-ni namgnirangko ra·na sikenga, na·simang pilakkon Aadhar baksa link ka·china chinga mol·molenga,” ine Lyngdoh parakataha.

Bang·a biaprangon Aadhar-na biming segatanirang komikuengani gimin a·dok sorkari, biming segataniko bariatna gita dingtang dingtang department, block office, deputy commissioner aro health centre baksa nangrime kamko ka·enga ineba ua aganaha.

Aadhar-na biming segatanio manderang altue man·na gita sorkari, hospital aro health centre ge·antion Aadhar link ka·ani cholrangko dongen ineba Health Minister parakataha.

MHIS card-ko tarianiara mandeni skaniosa ong·aia ine talataniko on·angengon, “Chinga darangkoba iana draenga ong·ja indiba na·simang ska ong·ode cholrang donga. Je manderangan iani namgnirangko cha·tote nikmanaha, uamangan sorkarini on·enggipa cholrangni gimin sakkiko on·na man·aigen,” ine Lyngdoh aganaha.

spot_imgspot_img

Related articles

Assam Governor assesses Karbi Anglong law and order situation

GUWAHATI, July 11: Assam Governor Lakshman Prasad Acharya on Friday chaired a review meeting with security agencies at Taralangso...

Sitharaman holds discussion with Meghalaya Governor on state’s issues

  Shillong, July 11: The Union Minister of Finance and Corporate Affairs, Nirmala Sitharaman, paid a visit to Raj...

92 Meghalaya border villages under Vibrant Village Programme

Shillong, July 11: Union Finance Minister Nirmala Sitharaman on Friday announced that 92 border villages in Meghalaya have...

22 Maoists, including eight females, surrender in Chhattisgarh

Raipur, July 11: In a significant development in Chhattisgarh's Narayanpur district, 22 Maoists laid down their arms on...