SHILLONG: Meghalaya a·doko niam gri napsrukanirangko champengna Inner Line Permit (ILP) gita dakgipa niamrangko ra·gatchenggijade rel project-rangna No Objection Certificate (NOC)-ko on·jachina Jaintia Students Union (JSU), Jaintia Hills Autonomous District Council (JHADC)-ko didiataha.
Iani bidingo JHADC-ni Chief Executive Membor Thombor Shiwat-na sedoatengon, Jaintia Hills-o railway station-rangko rikna ba rel ramarangko tarina gita Northeast Frontier Railway (NFR)-na NOC-ko on·jachina JSU mikrakataha.
“A·doko ILP-ko ra·gatna gita India sorkarini ge·etaniko man·kujaskal Jaintia Hills-o rel ramarangko tarina ba railway station-rangko rikna on·jachina chinga JHADC-ko didienga. ILP gri rel garirangko ra·bana NOC-ko on·genchimode niam gri napsrukanirangko champengna man·jawa aro ian Jaintia jatrangnasan ong·aigija Meghalaya a·doko songdongenggipa pilak Tribal-rangnan kenchakna nangani ong·gen,” ine JSU parakataha.
Gipin jatrangna gital trading licence-rangko on·jachina aro dingtang dingtang kamrango gipin jatrangko skatang rakkijachina gitaba JSU, JHADC-o dabiangaha.
“Jaintia Hills-o kam ka·e cha·ani aro bading chiwalani cholrangko joltangni Tribal-rangnasa on·chengna nanga,” ine JSU parakataha.
Dingtang dingtang dokkanrangko re·e nienba, licence-rangko check ka·china gitaba JSU dabiangaha.
Dokkanrango kam ka·enggipa Non-Tribal-rang donggenchimode, uamangni bimingrangko see donna gita ge·etaniko on·china JHADC-o dabiangengon, ia niamko ja·rikjagenchimode uandakgipa manderangko a·dokoniko a·rikgalna nanga ine JSU didiataha.
Benami Transactions (Prohibition) Act 1998-o pangchake bilakgipa ja·kurangko de·china gitaba JSU, JHADC-ko didiataha.