SHILLONG: Khasi aro Jaintia Hills a·jarangona rel garirangko ra·baanichi gipin biaprangoni niam gri napsrukanirang bilongbatgen ine dingtang dingtang dolrang kenchakenba jegaltokengon, a·dokona rel garirangko ra·baanichi gipin biaprangoni manderangko niam gri napsrukbana chol on·gen ong·ja ine a·dokni Deputy Chief Minister Prestone Tynsong parakataha.
Manderangni nangnikgijade maming kamrangkon sorkari jako ra·jawa ine talataniko on·angengon, a·dokona rel garirangko ra·baani bidingo bang·a manderangan aro dingtang dingtang dolrang, ong·gija dake ma·sisrettokenga ine Tynsong parakataha.
“Rel garirangni gimin agangenchimode sawa rel garirangko nangnikjawa? An·chingna rel garirangko nangchongmota. Rel garirangko ra·baaiani giminde gipin biaprangoni manderang, niam gri napsrukbae Meghalaya-o songdong a·chatokegen ia katta ong·ja. Rel garirangko ra·baanichi niam gri napsrukanirang batbebegen ong·ode anga an·tangba rel garirangko jegalaigen,” ine Deputy Chief Minister aganaha.
Rel garirangko ra·baani bidingo name chanchirimchengna nangenga ine janapatengon, rel garirangko ra·baani bidingo manderang ma·sisretengani a·selsa kenchakanirang ong·katenga ine Tynsong aganaha.
“Indiba ian indake ong·ja maina manderang iako ma·sisretengani a·selsa kenchakanirangba ong·katengba. Uni giminsa rel garirangni bidingo maming ja·kurangko de·na skangba jinma name chanchirimchengna nangenga,” ine ua aganenba, iani bidingo dingtang dingtang dolrang baksa parak ong·e agangrikna nangenga ine parakataha.
Manderang jeko nangnika ukon sorkari dakna kusi ong·aigen ineba Tynsong, ku·rachakaniko on·angaha. “Chinga pangnan manderangni skani gitasa kamrangko ka·enga aro ia rel garini kamoba chinga an·tangari maming ja·kurangko de·jawa indiba manderang baksa agangrikchengesa jekoba dakgen,” ine ua aganaha.
