SHILLONG: Rel project-ni bidingo chanchirimna gita pilak political party-rangni tom·aniko ong·atna miksongenganio bak ra·china gita a·dok sorkari, Voice of the People’s Party (VPP)-koba didiataha.
“Uamang (VPP) ia tom·anio bak ra·e, an·tangtangni nangnikani aro chanchianirangko aganpana nanga,” ine a·dokni Deputy Chief Minister Prestone Tynsong aganaha.
Rel project-rangni bidingo chanchirimna skang Inner Line Permit (ILP)-ko ra·gatchengchina dabienba, pilak political party-rangni tom·aniko ong·atanio bak ra·pajawa ine VPP aganahachim.
Tynsong-ni aganani gitade, Meghalaya Assembly-ni budget session-ko ong·atanioba, rel project-rangni bidingo chanchirimaha aro ma·mong sorkari, Meghalaya a·dokko man·chape pilak a·dokrangkon rel ramarangchi nangdimatna nangnikengani gimin a·dokni Chief Minister Conrad K Sangma, pilak political party-rangni tom·aniko ong·atna ku·rachakaniko on·ahachim.
Dingtang dingtang dolrang, rel project-rangko jegaltokengani giminsa sorkari, rel project-rangko donchengenba, iani bidingo apsan chanchirimna gita sorkari, pilak dolrangni tom·aniko ong·atna miksongenga ineba Tynsong aganaha.
Indake ong·genchimoba manderangni nangnikgijade a·dok sorkari, rel project-rangko jako ra·e ka·jawa ine Tynsong, ku·rachakaniko on·angskaaha.
Meghalaya a·doko rel ramarangko tariani bidingo chanchirimna gita pilak party-rangni tom·aniko ong·atanio bak ra·jawa ine re·anggipa Sombar salosan VPP-ni dilgiparang parakatahachim ine nikna man·a.
Rel ramarangko tariani bidingo chanchina skangde, a·dokona niam gri napsrukanirangko champengna gita ILP aro uandake bilakgipa niamrangko ra·gatani giminsa chanchichengna nangenga ineba VPP-ni dilgiparang aganaha.
Iani bidingo a·dokni Chief Secretary DP Wahlang-na sedoatengon, a·doko rel ramarangko tariani bidingo chanchirimna miksongengani gimin a·dok sorkariko mittelpilangaha indiba Khasi aro Jaintia Hills a·jarango rel ramarangko tarina skang, niam gri napsrukanirangko champengna rakgipa niamrangko ra·gatchengna nangenga ine VPP-ni dilgipa Batskhem Myrboh parakataha.
