SHILLONG: Voice of the People’s Party (VPP)-ni matnangatani ja·man Rajabala constituency-ni MLA Dr Mizanur Rahman Kazi-ba Opposition MLA-rangko, NPP-chi dilenggipa MDA sorkari nichanggalenga ine matnangataha.
Meghalaya a·dokni politics-o seoka man·gipa pilak dilgiparangkon mande ra·na nanga aro Opposition MLA-rangni nanganirangkoba knachakna nanga ineba Kazi aganaha.
“Anga songbadrango segipa koborrangko poraimanaha aro iarangara kakketan ong·a. Seokako man·ahaode ruling-o ong·ja maina, opposition-oba ong·ja maina an·ching pilakan apsan ong·a. Iani bidingo name nipiltaichina anga a·dokni Chief Minister-ko mol·molna ska,” ine Rajabala MLA aganaha.
Kazi-ni aganani gitade, seokako man·gipa pilak dilgiparangan, an·tangtangni constituency-ni manderangna dangdike on·skana gita sorkarini dakchake on·anirangko nangchongmota.
MLA-rang, je political doloniba ong·ja maina, an·tangtangni constituency-rangko wene, manderangko grongna nanga aro manderangni neng·nikanirangko namatna nanga ineba ua aganaha.
“Manderangde an·ching ruling ba opposition-o ong·aniko ma·sitokpaja indiba uamangni seokgimin dilgiparang inesan ma·sitokpaaia,” ine Kazi aganaha.
Assembly-ni sak 60 MLA-rangan, official-ni gita pilak man·gnirangko apsan daken man·na nanga ineba ua aganaha.
“Sal 60 MLA-rang pilakan apsan ong·e cholrangko man·na nanga. Saoba sorkarini gita maiba kamko man·naba gnang uade dingtang man·dapanirang dongchina indiba MLA-rang ong·e, chinga pilakan manderangni nangnikanirangko chu·sokate on·na gita apsan dakchakanirangko man·na nanga,” ine Rajabala MLA aganaha.