Manipur-ni KCP bobil dolni saksako Ri Bhoi-o rim·a

SHILLONG: Manipur a·doko bobil dake chakatani gimin champengako man·gipa bobil dolrangoni dolsa,  Kangleipak Communist party (KCP) – People’s War Group (PWG)-ni membor saksako Ri Bhoi police Sombar walo rim·aha.
Kangleipak Communist party (KCP) – People’s War Group (PWG-ni Finance Secretary, Nongthymmai, 15th Mile, Byrnihat-o para ra·gipa noko dongnue dongenga ine u·iatgipa koborko man·soani gimin Ri Bhoi police re·angenba, sandianiko dake Khundongbam Herojit Meitei-ko rim·eaha, jean tangka dabie ra·ani kamrango jak dongachim aro Meghalaya-o mangba tangka dabie ra·anirangko dakengachim.
Uoniko mobile phone ge·gni aro gipin lekkarangko man·aha. Sing·sandianiko dakon, ua KCP(PWG) dolni membor ong·a aro bobil dolni palo tangkarangko gilenga ine ku·rachakaha.
Manipur-o obostarang namjani a·sel dingtang dingtang bobil dolrangni kosako chel·chakgipa dolrang bilaken sandianirangko dakengani gimin, chel·chakgipa dolni jakoni jokna gita ua Assam-Meghalaya sima-arirango dongnue chakengachim.
Uni kosako Nongpoh PS-o mokordoma segataha aro sandianirangko dakenga.