GHADC-ko namdapatchina dabie CSO-rang asonge jingjengata

TURA: Garo Hills Autonomous District Council (GHADC)-ko chalaianio kamrangko namdapatchina aro GHADC-na dingtang electoral roll-ko tarian baksana Garo Customary Law (GCL)-ko ta·raken ra·gatchina dabie Bristibar salo, Garo Hills-ni Civil Society Organisation (CSO)-rang, sit-in-demonstration ba asonge jingjengataniko dakangaha.
Ia sit-in-demonstration-o Association for Democracy and Empowerment (ADE), Garo Students Union (GSU), A·chik Youth Welfare Organisation (AYWO), Tura Governement College Students Union (TGCSU), aro Federation of Khasi Jaintia and Garo People-Tura Government College Cell (FKJGP-TGC CELL) bak ra·angaha.
Jingjengatanio bak ra·gipa CSO-rangni parakatani gitade, GHADC-o dingtang electoral roll-ko tarin agita adita salrangna skang ong·atanggipa GHADC-ni session-o resolution-ko ra·manahachim indiba da·alona kingkingan electoral roll-ko tarina gita committee-ko songkujaenga.
“Uni gimin GHADC election-rango gipin jatrang bak ra·na man·jana gita dingtang electoral roll-ko tarina ta·raken committee-ko songchina chinga nangnikenga,” ine bakrimgimin CSO-rang parakataha.
Una agreba, Garo Customary Law (GCL)-ko ta·raken ra·gatchina, GHADC-o kam ka·enggiparangna service rule-rangko nambate tarichina, GHADC-o tangka paisa koros ka·aniko nambatatchina aro GHADC-ni kamrangko nambate nirokna man·na gita Public Accounts Committee (PAC)-ko songchina gitaba CSO-rang dabiangtokaha.