GHEPS-ni chang 22-gipa Environment awareness program-ko ong·ata

TURA: Garo Hills Environment Protection Society (GHEPS)-ni chang 22-gipa Environment awareness program-ko Rongram C&RD Block, DFO Social Forestry Division Tura, Soil & Water Conservation (Territorial) Division aro Asanang jolo donggipa dingtang dingtang mondolirang baksa nangrime, Asanang Multifacility Hall-o ong·atangaha.
Ia awareness program-ko ong·atanio, Meghalaya Legislative Assembly-ni Speaker Thomas A Sangma, mongsonggipa sokgipa ong·e, tom·anio bak ra·giparangna aganprakangengon, A·chik a·songo buring bolgrim aro chiring chibisikrangko tangatpilna kam ka·engon, ia daitoko jako ra·e kam ka·china chatro chatrirangko aro jolo songdongenggipa pilak manderangkon didiangaha.
Samtangtango ong·telaigiparangko tangatpilna aro ripinge rakkina gita a·dok sorkarini jako ra·e ka·enggipa kamrangni giminba Sangma, ia tom·anio agan-talatanirangko on·angaha.
Ia program-ko ong·atanio, GHADC-ni Executive Member, Forest & Environment In-charge Henen R Sangma-ba jinmana aganprakangengon, A·chik a·songo buring bolgrim, chiring chibisik aro uandake samtangtango ong·telaigiparangko tangatpilna aro ripinge rakkina gita GHADC-ba kamrangko ka·enga aro mikkangchiba samtangtango ong·telaigiparangko ripingna gita GHEPS baksa bakrime kamrangko ka·angkugen ine ku·rachakaniko on·angaha.
Ia program-ko ong·atanio, Tura Soil & Water Conservation (Territorial) Division-ni Divisional Officer, GHEPS-ni president Dr Merril Sangma, Soil & Water Conservation department-ni gitcham Director Dr KC Momin, Rongram C&RD Block-ni BDO Cherime R Sangma aro gipinrangba jinmana aganprakangaha aro uamangba, samtangtango ong·telaigiparangko tangatpilna aro ripinge rakkianio pilakkon bakrimchina gita didiangtokaha.