Tura: Tura-o donggipa Government Printing Press-ko gipin biapchina apjittangna am·enganina jegalenba, Achik State People’s Front-ni dilgiparang Bristibar salo, Printing Press-na gitalgipa buildingko Tura-on rike on·china dabie, Meghalaya-ni Chief Minister Conrad K. Sangma, aro Printing and Stationery Department-ni Minister A.L. Hek aro una agreba, Tourism Department-ni Minister, Paul Lyndoh-na chitti sedoaha.
ASPF, ni chittio janapatgimin gita, Tura-o gesamangmang donggipa Government Printing Press -o ru·utbea bilsirangonin Garo Hills a·dokna dangdike on·enganio dingtang dingtang neng·nikanirangko man·enganina iano kam ka·enggiparang suk ong·gijaniko parakaha. Indake Tura-o donggipa Printing Press office-ko gitalgipa nokchakani buildingko chanchisoani grian chu·gimikkon, Tourism Department-na lekka chappa ka·ani aro dingtang dingtang office-ni kamrangko pakwatataha.
Tura Press office-o minggittam mangsonggipa section-rang donga jean Industrial, Stationery aro Accounts. Uni gisepon Tura Press Office-o chu·ongagita biaprang dongjani a·sel lekka chappa ka·ani ostrorangko donanio neng·nikaniko man·a nangengan baksana chu·ongagita office-o kam ka·giparangko dona man·jani a·seloba neng·nikanirangko man·a nangenga. Una agreba nangchongmotgiparangko chappa ka·anio bijolichi maming neng·nikaniko man·jana gita 100 KVA transformer aro 100 kva generator-koba nangchongmotenga.
Indake ia 2025 bilsini, March 28 tariko iani bidingo Meghalaya-ni dingtang dingtang officialrangna memorandum-ko on·manahachim aro gitalgipa Printing Press Complex-ko Tura Holy Cross Hospital jolo, Tourism Department-ni gita rike on·a ku·rachakahaoba da·alonaba maming kobor dongjaengani gimin aro Garo Hills-ni Press office-ko gipinchina apjittangna miksonganio, Tura Prinring Press-o jakkalenggipa ostrorangko gipin district head quarter-rangona ra·angengachim jekon ASPF raken jegalaniko dakenga aro uana agreba, retired ong·anggiparangni biapo bangbang ong·e dongengipa kamrangna mande rimnapaniko gipin a·dokrango dakengoba, Garo Hills-ni press office-o dingtang dingtang kamrangna bangbang ong·e dongenggiparango rimnapaniko da·onaba dakkujaenga jean Garo Hills-ni manderangko mikkang nitee dakani ong·a ineba parakataha. Uni gimin, kosako janapgimin neng·nikanirangna aro dabianirangko ta·rake nirokatchina Meghalayani dingtang dingtang official-rangko molmolatenba, Tura Government Printing Press-ko gipinchina ra·angjachina ku·chake, pangchake lekkako see on·china aro gitalgipa Printing Press Complex-ko Tura-on rike on·china, una agreba, bangbange ong·e dongenggipa kamrangna ta·rake rimnapaniko dakchina dabiaha. Dabianirangko knachakjaode aro dongimin somoirango chu·sokatjaode, A·chik State People’s Front mikkangchi rakbata ja·kurangko de·ange jingjengatanirangko dakanggen ineba ASPF-ni General Secretary, Barnita Marak aganaha
