TURA: East Garo Hills a·jani Kusimkolgre Dalja Awe songo Simsang chibimaoniko aro Dawagre-o Rongpi chiringoniko dal·dalgipa ostrorangchi an·chengrangko bikotengani a·sel chiring chibisik aro ia jolrango songdongenggipa manderangna nangchakeaniko ra·baenga ina Garo Hills Youth Solidarity (GHYS), East aro North Garo Hills (T) Division-ni District Forest Officer-na badi ka·e sedoataha.
DFO-na badi ka·e sedoatgipa chittio GHYS-ni parakatani gitade, chiringrangoniko dal·dalgipa kol aro ostrorangchi an·cheng bikotaniko National Green Tribunal (NGT) champengatmanahachim indiba East Garo Hills a·jani ia jolrango da·onan dal·dalgipa kolrangko jakkale an·chengrangko bikotengkuani a·sel ian chiring chibisikrangna aro ia jolrango songdongenggipa manderangna nangchakeaniko ra·baani gita ong·enga.
“Kusimkolgre Dalja Awe-o JCB, tractor aro dumper-rangko jakkale an·cheng bikotaniko chinga nikna man·enga aro iandakgipa kamrangko Forest department-ba nikengon maming ja·kurangko de·jaenga. Ia sal somoirango manderang china diltokengani gimin Williamnagar jolrango songdongenggipa manderang, pilak kamrangnan Simsang chibimako jakkaltokpaengachim indiba da·o ia chibimaoniko niam gri dal·dalgipa kolrangchi an·cheng bikotengani a·sel manderang chirangko jakkalna man·jae, neng·nikanirangko chagrongna nangtokenga,” ine GHYS-ni president Endick Marak parakataha.
Dawagre-o donggipa Rongpi chiringoniko ML-13A 1410 JCB aro tractor-chi an·cheng bikotenga ine parakatengon, ia jolrango songdongenggipa pilak manderangan Rongpi chiringko jakkaltokpaengachim indiba da·o ia chiringoniko niam gri an·cheng bikotengani a·sel manderang auna, ba·ra su·na, bosturangko su·galna aro pilak kamrangkon ka·na man·jaengaha ine GHYS matnangataha.
Indake ong·engon, Rangmalgre song sambao donggipa ramao niam gri ro·ong bikotengani a·sel samtangtango ong·telaigiparangna aro jolo songdongenggipa manderangna nangchakeaniko ra·baenga ineba GHYS, DFO-na badi ka·doangaha.