TURA: Catholic bebera·giparangni kosako aro adita salrangna skang a·gilsakko watanggipa Pope Francis-ni kosako kragija dake social media-o seahani gimin Garo Hills Catholic Union (GHCU) raken jegalataha aro ia kattarangko segipa manderangko kema bi·china dabiangaha.
GHCU-ni secretary HN Marak-ni parakatani gitade, ‘The Garo Hills Times Now’ aro Ephilson Sangma minggipa mandeni page-o adita salrangna skang, Catholic Mondoliko aro sianggipa Pope Francis-ko chonnike seahachim aro iandakgipa kattarangko seanichi, ian Catholic bebera·giparangko gisik saatanisan ong·aigija, manderangko dilsretna aro tom·tome songdong cha·enggipa dingtang dingtang toromni gisepo meligrikgijaniko ra·bana jotton ka·ani gitaba ong·aha.
“Pilak toromkon, uamangni skianirangko aro uamangni dilgiparangko mande ra·na nanga aro iandake Catholic bebera·giparangni kosako kragija dake chonnikaniko chinga ra·chakna man·chongmotjawa,” ine GHCU-ni secretary, seachi parakataha.
Iani bidingo, ‘The Garo Hills Times Now’-ni nokgipa, iano bak donggipa aro Ephilson Sangma, konta 48-ni gisepon jinmao kemako bi·na nanggen aro uamang sakprakprakan, konta 48-ni gisepon, GHCU-o kemako bi·na nanggen ineba GHCU dabiangaha. On·gimin somoi gita jinmao aro GHCU-o kemako bi·jagenchimode, aino pangchake ia manderangni kosako ja·kurangko de·anggen ineba GHCU-ni secretary mikrakataniko on·angaha.
Uamang, Catholic Mondolini mikkim aro rongtalaniko chel·chakna gita an·tangtangko on·kangenga ine janapatengon, mikkangchiba iandake Catholic Mondolini kosako chonnikna ba ong·gija dake gipatna jotton ka·genchimode rakgipa ja·kurangko de·anggen ine GHCU mikrakataniko on·angaha.
Social media-o jakkalengon, an·tangtangna on·gimin bilko jakkalsretjachina aro iandaken jat ba toromni gisepo meligrikgijaniko aro ma·sisretaniko ra·bajachina gitaba GHCU, social media-ko jakkalenggipa pilak manderangkon didiataha.