SHILLONG: Da·al May 1 tarikoni May 8 tarikona ong·atenggipa Secondary School Leaving Certificate (SSLC) Supplementary porikkako sena gita register ka·gipa sak 8918 chatro chatrirangoni sak 7085 candidate-rang sena a·bachengengaha.
Ia SSLC Supplementary porikkako Khasi-Jaintia Hills jolrango dam 49 aro Garo Hills-ni dam 27 centre-rangko man·chape gimik dam 76 centre-rangko ong·atenga.
Education Department-ni see rakkianiko parakani gitade, ia supplementary porikkako sena register ka·ani 79.44 percent ong·aha aro ian a·doko bang·bata chatro chatrirangni SSLC porikkako pass ka·na miksonganiko mesokani ong·enga.
Ia supplementary porikkako seenggipa sak 7085 chatro chatrirangoni sak 2235-de Khasi Hills jolrangoni aro sak 4850-de Garo Hills jolrangoni ong·skaenga.
Ia SSLC supplementary porikkara, ia bilsini SSLC porikkao chu·sokna man·pagijagipa chatro chatrirangna ia apsan bilsion pass ka·na man·na gita cholko on·taienggipa porikka ong·a.
Ia bilsini SSLC porikkao gimik sak 51,560 chatro chatrirang seenba, sak 41,275 chatro chatrirang pass ka·na man·ahachim. Porikkao chu·sokna man·pagijagipa sak 8918 chatro chatrirangba da·o ia supplementary porikkao sepiltaina cholko man·skaengachim.
Ia supplementary porikkani result-rangko May jani gisepon parakgen aro chatro chatrirangko ja·manchakgija higher secondary school-rango admission ra·na cholko on·gen ine MBOSE official-rang parakataha.
Indake ong·engon, ia SSLC supplementary porikkako seenggipa pilak chatro chatrirangnan Education department-ni Commissioner & Secretary Vijay Kumar Mantri, an·tangni namgipa skanirangko on·ataha.