Skanggipa bako bol 13,000 gitcham garirangko ra·galgen
SHILLONG: Bristibar salo, a·dokni Cabinet, Vehicle Scrappage Policy (VSP)-ko ra·chakangaha aro ia policy-ni skanggipa bako, bol 13,000 gitcham garirangko ramarangoniko ra·galna tik ka·angaha.
Iani bidingo kobor ra·timgiparangna talataniko on·angengon, “Ia niamko Cabinet ra·chakahani gimin gitcham aro nosto ong·gimin garirangko ra·gale, balwa moila ong·aniko namatna ja·kuko de·gnok. Skanggipao chinga bilsi 15 ba una batgipa gitcham sorkari garirangko ra·galgen aro uan sorkarini bol 5000 gitcham garirangko ia niamni skanggipa bako ra·galgen,” ine a·dokni Cabinet Minister aro MDA-ni ku·wattimgipa Paul Lyngdoh parakataha.
Ia niamni namgnirangko janapatengon, gitcham garirangko ra·galanichi balwarangni moila ong·aniko komiatna, to ra·baaniko komiatna aro ong·telaigipa bosturangko jakkalna manderangko didianio bang·en namgnirangko ra·bagen ine Lyngdoh aganaha.
Lyngdoh-ni parakatani gitade, da·o dipet Shillong-o register ka·gimin bol 2,76,262 garirang donge a·doko bang·batgipa ong·enga aro uni ja·man Tura aro Jowai-o ong·enga.
“Ia VSP-ko jinmana u·iatahaon, niamrangko a·dok gimikon ja·rikanggnok,” ine Lyngdoh aganaha.
Private garirangko ra·galani bidingo janapatskaengon, bilsi 35 ba una batgipa gitcham garirang a·doko bol 8000-mangni gita donga aro ia garirangko, ia niamni ning·o ra·galchenggen ine Lyngdoh aganaha.
“Sorkarini bol 5000 aro private garirang bol 8000 ong·e gimik bol 13,000 ong·enga aro ia niamni skanggipa bako, ia bol 13,000 gitcham garirangko ra·galgen,” ine Cabinet Minister aganaha.
Lyngdoh-ni aganani gitade, Delhi aro uandakgipa dal·dalgipa biaprangode bilsi 10 aro bilsi 15-ni gisepo ong·gipa gitcham garirangkoba ra·gale galenga indiba Meghalaya a·doko manderangni janggi tangani gadangko nienba sorkari, bilsi 35 ba una batgipa gitcham garirangkosa da·o dipet ra·gale galchengna sienga.